Nanagko ang mga mata ni Inyok dihang pag-adto niya sa Hapit Una Bay nga imnanan gikan sa iyang trabahoan, maoy nasawod sa iyang panan-aw si Cutie nga nagdrayeb sa bag-ong motorsiklo angkas ang usa ka batan-ong lalaki nga mao pa gyu’y pagkanaog. Haskang suroka gyod sa iyang dugo nga nagsud-ong.
Uyab niya si Cutie. Iyahang kuwarta ang gipalit sa maong motor. Gihatag niya kini ngadto sa dalaga sa miaging Sabado agi’g birthday gift. Ug naunsa ba, nga may lain man diay kining gikuladiding.
Wala maglangay si Inyok. Nagdilaab sa kasuko ang iyang galamhan nga miduol sa nahimutangan sa duruha ka batan-on ug walay kukaulaw nga milabni sa motor: "Bawion ko na lang ni kay duha man diay mi. Gilumpong man mi nimo."
"Ang tigulang baya, paselos-selos pa gyod. Mora pod og walay asawa," ni Cutie pa nga sa walay kuti mitugyan dayon sa motor ngadtong Inyok. "Oh, nia ang yawe. Hala, kabay-i nang imong motor." Ug miagbay ang dalaga sa kuyog nga tisoy'ng lalaki dungan ang pag-ingon: "Tana, Love, adto ta sa sulod aron magpalamilami."
Daw bara nga giugbok si Inyok sa iyang gitindogan, kinsa wa gyod magtuo nga mabuhat kadto sa linalang nga iyang gigastohan pag-ayo. Iya untang apason si Cutie sa sulod apan may palad nga mipatong sa iyang abaga. Napalingi siya ug iyang nakita si Ninang, iyang misis nga naghilak.
"Inyok, tinuod gyod diay ang mga tabitabi sa atong mga silingan nga ikaw naay batan-ong babayeng gikabuangan ug gipalitan pa gyod nimo’g motor. Di ka makalimod kay dugay na tikang gipanid-an ug karon nasakpan na gyod tika sa akto. Mao ba kini ang gibalos mo sa akong kabuotan?" Giuyog na gyod sa masubsob nga mga bakho ang kalawasan ni Ninang.
Wa makatingog si Inyok. Giagbayan niya iyang kapikas, gialam-alaman og sakay sa nagsinaw pang motor, nanguli sila sa ilaha. Ug ilang giistoryahan ang maong hitabo.
Sobra kamasinaboton si Ninang. Sakit man kaayo ang gihimo sa iyang bana ngadto kaniya, nakapasaylo ra gihapon ang ubanon nang inahan sa lima ka anak nga may tulo pa ka mga estudyante nga gigastohan sa kolehiyo. Iya man gong natanom sa iyang kasingkasing kadtong "I dos, I dos, for better and for worst till death do us part", mga sagradong pulong gipanumpaan nilang Inyok atubangan sa altar sa kaminyoon.
Unya human ipahungaw ni Ninang ang tanang kahiubos ngadto sa badlongon niyang bana, milurang ang dakong unos nga misulay pagbugto sa lig-ong pisi sa ilang kaminyoon. Human sa mapintas nga bagyo, matahom nga kahayag ang mipuli sa ilang kinabuhi.
Ning tungora gisugid ni Ninang ang gimodelo niyang usa ka buotang bana ug usa ka responsableng amahan ngadto kang Inyok. "Sus, kun pareho ka pa lang unta ni Lino nga atong silingan, Nyok, tingale di dyod unta ta makaagi og problema sa dughan."
"Mao bitaw'ng naingon ini ko, Ninang, kay siya man ang akong gisunod." Mubo pero pintok nga tubag ni Inyok.
Tubag nga nakapaamang ni Ninang makadiyot, kinsa sa kaulahian nakapanghupaw: "Aw, unsa diay?" (Kataposan)