Gula 73
Naputol ang ilang panagsulti. Nahutdan na’g load ang cellphone ni Bradley. Apan wala madugay, mibagting ang iyang cellphone. Nanawag si Col. Antipon kaniya. Iya kining gitubag. Ug gisaysay niya ngadto sa iyang opisyal ang tanan nga gusto niining masayran kun nganong kuyog niya karon si Sandra Diolan.
Ingon sa nakasabot si Col. Antipon sa iyang gisugilon. Nasuta niya nga wala pa kawad-i og pagsalig ang koronel sa iyang kaligdong. Mipasalig kini nga motabang kaniya.
“Pulos inutil ang imong mga sakop, Col. Rivera,” nagpaminti sa kalagot si Morris Sta. Ana pagkabalita nga wala gayo’y nahimo ang mga sinugo sa koronel sa pagpangita nila ni Sandra ug Bradley.
Gipatawag niya ang koronel sa iyang resthouse sa Sugbu.
“Gikasubo ko, Mr. Sta. Ana,” nagkanayon si Col. Rivera. “Apan mopailob una kita. Kanunay naglihok ang akong mga tawo sa pagpangita nila ni Sandra Diolan ug SPO1 Bradley Mangubat.”
“Pangita’g paagi, Col. Rivera,” ni Morris pa, “nga atong masayran kun asa ang dapit nga posibleng maoy tagoan nila ni Sandra ug SPO1 Mangubat.”
“Husto,” matud sa koronel nga nakapanglitik sa tudlo niini. “Ang inahan ni Mangubat. Sukitsukiton nato ang inahan ni Mangubat.
Sirado ang restaurant ni Nang Diday sa Manalili sa pag-abot nila ni Morris ug Col. Ver Rivera sa maong dapit. Milahos sila ngadto sa gipuy-an niini sa Talamban. Didto ilang gikasulti ang inahan ni Bradley. -- Sumpayan pa