Gula 68
“Diha ka masayop, Sonia. Tungod kay kun tinuod pa nga walay daotan nga motunhay, dili unta modagsang ang mga tawong daotan karon sa kalibotan.
May isulti pa unta si Sonia sa dihang may lagubo silang nabati didto sa gawas. Kusog kaayo ang lagubo. Mora’g may mga tawo nga nakasulod sa balay.
Bisan wala pa makaseguro si Sonia nga may mga tawo nga nakasulod sa balay ni Ethan apan inanay na siyang nabuhian sa paglaom.
Apan lahi ang reaksiyon ni Ethan. Nagpaminti kini sa kapungot. Nakita ni Sonia nga milanit si Ethan sa pistola gikan sa hawak niini.
May miliso sa seradora sa pultahan sa studio nga ilang nahimutangan apan dili kini maabli. Giserado kini ni Ethan. Gi-double lock pa.
“Sonia,” nabati nila ang tingog sa usa ka lalaki didto sa gawas. “Si PO1 Roy Cleopaz kini.”
Pagkadungog ni Sonia sa tingog ni Roy, ingon sa gibati niya ang talagsaong kahinangop. Apan si Ethan ingon sa mibatig tumang kalagot. Miliraw ang nagtuyok nga kalimutaw niini. Gi-cock ni Ethan ang armas nga gigunitan niini ug gitumong ngadto sa pultahan.
Gikuyawan si Sonia. Kun mangahas pagsulod si Roy, seguradong maigo gayod kini kun pusilon ni Ethan. --Sumpayan pa