Gula 67
Nahapayanghag si Sonia. Dili ang tingog ni Ethan ang iyang nadungog kundili ang tingog sa misteryosong tawo nga nanawag kaniya sa telepono.
Nakita ni Sonia nga giluwa ni Ethan gikan sa baba niini ang daghang gapas. Misantop sa hunahuna ni Sonia nga ang pag-ugom ni Ethan og gapas maoy hinungdan nga nausab ang tingog niini.
“E-Ethan, i-ikaw ang...”
“Ang misteryoso nimong caller,” sawo ni Ethan sa buot niyang isulti.
“M-my God!”
“Daghan ka pa og wala masayri mahitungod kanako, Sonia nga ako nang gipadayag kanimo karon.”
“Nga-nganong imo kadtong gibuhat?”
“Tungod kay naluoy ko nimo sa dihang gi-reject ni Mr. Johnny Orioque ang gisulat nimong balita. Mao nga nakahunahuna ko pagtabang nimo.”
“Mao diay nga suheto ka kaayo sa mga panghitabo kay...”
“Yes, tungod kay ako ra man usab mismo ang naghimo sa krimen. Apan dili ka angay nga mobasol nako, Sonia. At any rate, nakatabang ako sa imong career.”
“Pero kinahanglang manubag ka sa balaod sa krimen nga imong nahimo.”
“Kana lagi kun ila kong madakpan.”
“Walay daotan nga motunhay, Ethan.” -- Sumpayan pa