Gula 66
“Gikasubo ko, Ethan,” ni Sonia nga nakahukom na lang gyud nga prangkahan si Ethan. “Apan dili mahitabo nga mahigugma ko sa usa ka kriminal.”
“Pwes, magpabilin ka usab dinhi nga sama sa usa ka binilanggo. Dili ko ihatag kanimo ang imong kagawasan hangtod nga makakat-on ka sa paghigugma kanako.”
Napawong ang panan-aw ni Sonia dihang kalit kaayong gisumbag ni Ethan ang iyang kuto-kuto.
Dihang nabalikan na si Sonia sa panimuot, iyang namatngonan nga gigapos na siya sa usa ka haligi. Maglisod siya paglihok tungod kay hugot kaayo ang pagkagapos sa iyang mga kamot ug tiil.
Nahinumdom na siya sa nahitabo kaniya. Gisuntok ni Ethan ang iyang kuto-kuto hinungdan nga nakuyapan siya. Apan karon wala na niya makita si Ethan. Hain man kaha si Ethan?
Samtang wala pa si Ethan, angay unta nga mohimo na siya’g lakang aron makaikyas gikan sa gipuy-an sa ulitawo. Apan wala siya’y mahimo tungod kay ginapos man siya. Wala’y laing misantop sa iyang hunahuna gawas sa pag-ampo nga unta adunay laing tawo nga makaluwas kaniya.
Naabli ang pultahan sa studio. Nakita niya nga misulod si Ethan. Miduko siya dihang iyang namatikdan nga miduol kini sa iyang nahimutangan. Dili siya buot mosud-ong sa nawong sa tawong kriminal.
“Kumosta ka, Miss Atienza?” Matud ni Ethan. -- Sumpayan pa