Nasuta niya nga dili gayod magpabalibad si Roy maong wala na lang siya mo-ik. Nasuta man usab niya nga nagpakabana lang si Roy sa iyang kahimtang.
Nagdali-dali si Sonia paghikay sa panihapon nila ni Roy. Si Roy nahibilin didto sa sala nga nagtan-aw sa salida sa telebisyon. Iya kining gitawag dihang andam na ang lamesa alang sa panihapon.
Nagpahibalo ka na ba sa imong pamilya nga dili ka makapauli karon?” Sukit ni Sonia sa dihang nanihapon na sila.
“Nanawag na ko sa amo,” ni Roy pa. “Gipahibalo ko na sila si Papa ug Mama nga dili ko makapauli.”
“Sila ra diay ang imong gipahibalo?”
“K-kinsa pa man diay lain?”
“Ang imo diay’ng asawa?”
“Minyo na ba diay kong tan-awon?”
Wala motingog si Sonia. Gusto lang niyang sutaon kun wala pa ba gyu’y kabilinggan sa kinabuhi si Roy.
Human sa panihapon, mibalik si Roy sa sala. Si Sonia maoy nanghipos sa ilang mga kinan-an. Human sa mga bulohaton sa kosina, miagpas siya sa nahimutangan ni Roy sa sala.
“Dili na ba gayod mausab ang imong hukom?” Gipahunat ni Sonia si Roy.
“Bahin sa unsa?” Misumbalik pagpangutana si Roy.
“Nga dili ka mopauli karon?”
“Oo. Bantayan ko ikaw. Tingalig mobalik kadtong tawo nga naniid nato kaganina ug pasipad-an ka.” -- Sumpayan pa