Pangilin sa Tanjay, Negros Oriental. Sayo pa gani sa buntag didto na si Luz sa waiting shed sa ilang pergola kauban ni Luding nga ilang katabang. Matag trak pasaheroan nga manglabay mahinamon nilang tan-awon ug bantayan nga mohunong. Adunay bisita si Luz nga gipaabot. Samtang nagpaabot nanumbalay sa hunahuna ni Luz ang sulat ni Fred. "Luz, kaluy-a na intawon ko," pangaliyupo ni Fred sa iyang sulat. "Hatagi na ko sa imong hukom mahitungod sa gugma kong gihalad kanimo."
"Wa ko mabatasan, Fred, ang paghatag sa akong hukom pinaagi sa sulat," tubag ni Luz sa mga pangaliyupo ni Fred. "Kun buot kang masayod sa akong hunahuna lakaw ngari sa pangilin sa among lungsod kay ari ko ibutyag kanimo ang akong hukom."
Si Fred usa ka banggiitang magsusulat. Kanunay siyang manaog sa mga bangga sa sinulatay nga pasiugdahan sa mga Kapunongan sa tadhan nga mga magdadagang. Palaanak ang iyang dagang hinungdan nga nainila siya sa katilingban. Daghang mga tsiks ang mopenpal kaniya ug iya kining rakrakan sa hinashasan niyang mga amural. Silang tanan manugot. Apan lahi kini si Luz kay paadtoon gayod sa ila ang maghahalad ug adto na hatagi sa iyang hukom.
Eeeeeeeekkk!!! Miigot ang brake sa Series Liner. Mihunong ang trak sa may pergola. Mitan-aw niini sila si Luz ug ilang nakita ang usa ka tawo nga nagkratsis ug naglisod pagkanaog.
"Uy, bilanggotanan! Inutil man diay!" nakatuaw si Luz. Aron dili kini mopadayon sa iyang tinguha pag-angkon sa iyang gugma may nahunahunaan siyang paagi.
"Ikaw ba si Fred Monthel?" sukna ni Luz nga nagpanguho-nguho.
"H-Haaaa??? Aw, oo," tubag ni Fred nga nakalitan. Sus, nguho pa mang Daming! Nagkanayon ang iyang hunahuna. "I-kaw.... si Luzviminda Mondragon ka ba?"
"Oo," way kadasig nga mitubag si Luz.
Nanglakaw sila paingon sa kusina aron mangaon.
Human sa makabuhong nga paniudto kauban sa daghang mga bisita gihimo ang programa.
"Mga higala, nahingpit ang kamabulokon sa ato karong kalingawan kay nia si Fred Monter, ang banggiitang magsusulat sa Sugbo," nagkanayon ang EMCE. "Agig bukas ning atong programa atong paawiton si Miss Luzviminda Mondragon, ang Superbisor sa Tanjay Elementary School!"
"Supervisor?" tuaw ni Fred sa kaugalingon. Duna ba diay Supervisor nga nguho?
Miawit si Luz. Dili diay kini nguho. Labihan kalarino niining manglitok sa mga pulong. Samtang nagaawit gitawag ni Fred ang EMCE ug dihay gihunghong.
"Mga higala, ang sunod nga bahin sa atong tulumanon mao ang sayaw," singgaak na usab sa EMCE human sa awit ni Luz. "Kini pagahimoon ni Mr. Fred Monter pinarisan ni Miss Luz Mondragon."
Mosayaw ang inutil? Tuaw na usab sa hunahuna ni Luz. Unsaon, magbubakintol?
Gisawilik ni Fred ang sungkod ug nagdagan nga miduol kang Luz. Nahingangha ang dalaga kay dili man diay bakol ang ulitawo. Maayo kaayo kining mosayaw sa Tanggo.
Human sa sayaw.....
"Luz, dili ka man diay nguho!" ni Fred pang nagkatawa.
"Ikaw 'sab .... dili diay bakol!" tubag ni Luz nga nagpangusi kang Fred. "Maldito ka gyod, ha! Nganong imo man kining gihimo?"
"Aron pagsukod kun imo ba akong gihigugma," ni Fred pang migunit ug mipislit sa hamis nga palad ni Luz. "Ikaw ... nganong nagpanguho-nguho ka man sab?"
"Sa tuyo nga sama sa imoha," ug mipahiyom si Luz. "Karon, Luz, komusta na man ang gihalad kong gugma? Matud mo karon mo ihatag ang imong hukom. Unsa man kanang hukoma! Kalipay ko ba o kasakit?"
"Kalipay Fred".
"Salamat, Luz. Daghan kaayong salamat!" ni Fred pang migakos kang Luz ug midigo sa nagpungasing mga halok. (Kataposan)