Estrikta nga pagka babaye si Miriam. Apan tungod kay gihigugma ko man siya sa tinud-anay, gihalaran ko siya sa akong gugma. Pero pulos pagbiaybiay sa akong pagkatawo ang nadungog ko gikan kaniya.
"Ikaw nga usa lang ka drayber sa among pamilya nahigugma kanako?" ni Miriam pa. "Kabaga god nimo’g nawong nga nangahas pagsulti ingon niana kanako?"
"Pasayloa ko, Ma'am," matud ko. "Apan mao kana ang matuod kong gibati nganha kanimo. Gihigugma ko ikaw."
"Hilom," singhag ni Miram. "Ingna lang hinuon nga gusto kang manghantok."
Wala na lang ako magtingog.
Tulin nga nanglabay ang mga adlaw. Nagpadayon ako sa pag-alagad sa pamilyang Nalez isip ilang family driver. Apan wala na gayod ako mousab sa pagpanga-moral ni Miriam. Mibahad man god siya nga iyang tug-anan ang iyang mga ginikanan kun magpadayon ako sa pagpangulitawo kaniya. Nahadlok ko nga mataktak sa akong trabaho. Ako ra ba ang breadwinner sa among pamilya.
Usa ka adlaw niana nasayran ko na lang nga may hinigugma na si Miriam. Siya mao si Sam. Sama kang Miriam, adunahan usab ang mga ginikanan ni Sam. Nanag-iya kini’g dakong negosyo sa dakbayan sa Sugbo.
Sa akong nasayran, hingpit nga nabugto ang akong paglaom nga maangkon ang gugma ni Miriam. Sakit kaayo alang kanako ang maong kamatuoran. Mao nga nakahukom ko nga mobiya sa akong trabaho isip family driver nila ni Miriam. Mipauli ko sa among probinsiya. Didto gitun-an ko sa paghikalimot si Miriam, ang estriktang babaye nga akong gihigugma.
Miabot ni Bonita sa akong kinabuhi. Nagkahigugmaay kami. Malipayon kami sa among relasyon. Buotan man god si Bonita. Masinabuton. Lahi ra kaayo siya’g kinaiya ni Miriam. Dili estrikta si Bonita.
Dihang nagkasabot na kami nga magminyo, mibalik ako sa siyudad sa Sugbo aron manarbaho agi’g pangandam sa among kaminyoon. Kapin na sa usa ka tuig ang among relasyon niadtong tungora.
Nagbagdoy ako sa siyudad aron pagpangitag trabaho. Pero walay bakante. Hangtod nga sa akong paglaroylaroy sa siyudad, gikabagat nako ang mga ginikanan ni Miriam nga kanhi kong mga agalon.
"Hain ka na man karon magtrabaho?" sukit ni Mr. Nalez.
"Wa pa lagi koy trabaho Sir," mubo kong tubag. "Padayon pa kong nangita hangtod karon."
"Nganong dili ka man hinuon mobalik og trabaho diri kanako?" ni Mr. Nalez pa. "Bag-o lang mipahawa ang family driver nga mipuli nimo. Busa, puyde ka nga mobalik."
Wlaa ko motingog. Dihay akong gihinuktokan. Misantop sa akong hunahuna si Miriam. Unya nahinumdom dayon ko kang Bonita.
"Sige, Sir," nako pa pagkilab sa pipila ka daklit. "Mobalik ko’g trabaho sa inyong pamilya."
Ako nay nagmaneho sa sakyanan ni Mr. Nalez sa pagpauli niya sa ilang pinuy-anan. Sa among paghiabot, misugat kanamo si Miriam. Nakalitan ko pagkakita kaniya. Mabdos na diay kini. Dako na’g tiyan.
Pero labaw siyang nakalitan pagkakita kanako. Midali siya’g balik sa sulod sa balay nga walay tingog-tingog.
"M-minyo na diay si Ma'am Miriam, Sir?" gisukit ko si Mr. Nalez.
"Minyo ba uroy," ni Mr. Nalez pa sa sinultihan nga may tuno sa panghimalingka. "Nabiktima sa pasalig. Gipaangkan ni Sam."
Daw dili ko makatuo sa akong nadungog.
"Abi ko ba’g estrikta siya," bagulbol nako sa hilom. "Humok man diay og ilong."
Ug nakatamihid ako dungan ang pagpanglingo. (Kataposan)