Gula 24
Sa sala sa balay nga gipuy-an ni Sonia, nag-atubang sila si PO1 Roy Cleopaz. Nag-atbang sila nga naglingkod sa sopa.
“Mahinungdanon gyud tingali ang imong tuyo kanako, PO1 Cleopaz,” ni Sonia pa, “kay mianhi ka man gyud sa akong gipuy-an bisan gabii na.”
“Puyde bang Roy na lang ang imong itawag nako?” sugyot ni PO1 Cleopaz. “Mora man og pormal ra kaayo kun tawgon ko nimo’g PO1 Cleopaz. Ug Sonia na lang usab ang akong isangpit kanimo. Okey ba?”
“O-okey,” ni Sonia pa. “Kun maoy imong gusto Roy.”
“Good,” nagkanayon ang polis.
“Giunsa nimo pagtultol sa akong gipuy-an, Roy?” sukit ni Sonia.
“Nanawag ko sa buhatan sa Bantay Balita,” tubag ni Roy. “Nagpakisayod ko kun hain ka magpuyo.”
“Unsay akong ikaalagad kanimo, Roy?”
Mipakibo sa abaga si Roy. “Ordinaryo lang ang akong tuyo sa pag-anhi sa imong gipuy-an. It’s not about business. Gusto lang kong makigsuod nimo.”
Nahimut-okan si Sonia. Nabatyagan niya nga inanay na usab nga mipatigbabaw ang iyang pagka man hater. Apan gipaningkamotan niya ang pagpugong sa iyang kaugalingon. Gipaningkamotan niyang ikapatig-babaw ang propesyonalismo.
“Imo diay’ng igsuon si Anita Atienza?” nangutana si Roy.
“Oo,” tubag ni Sonia. “Nganong nakaila ka kaniya?”
“Nakabalita ko bahin sa iyang paghikog. Anugon siya. Batan-on pa siya. Ngano gyung gihunos niya ang kaugalingon niyang kinabuhi.” -- Sumpayan pa