Gula 20
Apan dako ang pagtuo ni Sonia nga dili mahitabong magpaila ang maong tawo kaniya. Posibleng may kasayoran kini sa nahitabong krimen mao nga mahadlok kining magpaila kay basin unya’g dumtan kini sa mga mamumuno. Misantop sa hunahuna ni Sonia nga posibleng nakaila ang misteryoso niyang caller sa responsable sa kamatayon ni Helen Ogmoc.
Tungod sa dakong kalipay nga gibati ni Sonia sa iyang kalamposan nga naangkon, gi-treat niya’g paniudto si Ethan. Siyempre, kalamposan usab ni Ethan ang naangkong kalamposan ni Sonia tungod kay sila man ang mag-partner.
Inanay na sab nga naka-adjust si Sonia sa kinaiya ni Ethan. Sa una niyang pagkakita sa lalaki nagtuo siyang suplado kini. Antipatiko ang maong lalaki alang kaniya. Apan karon inanay na silang naka-adjust sa usa’g-usa. Nasayod si Sonia nga naglikay sab si Ethan nga magkabangi sila.
Pagkasunod adlaw, nakigkita si Sonia kang PO1 Roy Cleopaz. Wala na niya ikuyog si Ethan. Nag-follow-up siya mahitungod sa kaso sa kamatayon ni Helen Ogmoc. Namasin siyang may development na ang imbestigasyon sa kapolisan mahitungod sa maong kaso.
“Hanap kaayo, Miss Atienza,” nagkanayon si PO1 Cleopax. “Maayong pagkahimo sa suspek ang krimen. Limpiyo kaayo. Wala kami nakuhang trace ug clue.” -- Sumpayan pa