Gula 6
Sa Agora, nangita sila’g dapit nga kaparkingan sa ilang sakyanan. Unya misuroy si Sonia sa mga aseras sa Agora. Nagsunod kaniya si Ethan.
Wala madugay, nasugatan nila ang grupo sa mga batang Badjao. Ang maong mga bata mosugat sa mga tawo aron pagpangayo og limos.
“Kuhai sila’g hulagway, gimandoan ni Sonia si Ethan.
Abtik nga mituman si Ethan sa iyang mando. Nagsunodsunod ang pagkidlap sa kamera niini nga mikuhag hulagway sa mga Badjao.
“Ipa-develop dayon kana,” mubong tugon ni Sonia.
Namalik dayon sila ngadto sa BBN Publications.
Igong nahuman pagsulat ni Sonia ang iyang estorya atubangan sa computer, nahiabot si Ethan sa iyang desk ug gihatag ngadto kaniya ang mga hulagway nga nakuha niini kaganina didto sa Agora.
Gi-print ni Sonia ang gisulat niyang estorya. Unya iyang gipilian ang mga hulagway nga giduso ni Ethan kaniya kun hain niini ang angay niyang isukip sa gisulat niyang balita.
Misulod siya sa buhatan ni Mr. Johnny Orioque, ang editor-in-chief sa Bantay Balita, dala ang sinulat niyang artikulo ug ang mga hulagway nga iyang napili. Naabtan niya ang editor nga nag-atubang sa computer ug may gi-encode. Pero milingi kini pagkamatikod sa iyang pagsulod.
“Nia na ang akong estorya, Sir,” matud ni Sonia nga mibutang sa ibabaw sa lamesa sa iyang manuskrito ug sa mga hulagway.
“Good,” sa editor pa. “Mao kanay akong nagustohan nimo, Miss Atienza, tungod kay kadali ka rang makakita’g estorya nga angay sulaton.” -- Sumpayan pa