Gipatawag sa tagdumala sa Spade Paradise Lodge ang tanang mga kawani niini. Lakip sa gipatawag ang mga guwardiya, room boy ug ang nagbantay sa counter diin adto mo-check in ug mo-check out ang mga guest.
"Hugtan nato ang pagbantay sa atong lodging house," nagkanayon si Mr. Tetie Tallo, ang manager sa Spade Paradise Lodge. "Kinahanglang inspeksiyonon ninyo ang mosulod ug mogawas nga mga guest aron masulbad na kining padayon nga pagpangawat sa mga bed sheets sa mga guest rooms."
"Unsa man ang angay namong buhaton, Sir?" Nangutana si Eslaw, usa sa mga security guard nga maoy nagbantay sa main lobby sa lodging house. "Maikog man usab kita sa mga kustomer kun inspeksiyonon gyud lakip ang ilang mga bag."
"Pasabta lang sila sa atong tumong," matud sa manager. "Gikinahanglan nato ang ilang kooperasyon aron masulbad na ang kinawatay sa mga bed sheets nga puti sa atong mga guest rooms."
Walay nahimo ang mga kawani ug ubang trabahante sa Spade Paradise Lodge gawas sa pagtuman sa kamandoan ni Mr. Tetie Tallo. Nagbutang gilayon sila'g mga pahibalo nga gipatapot sa bungbong sa mga guest rooms. Ang pahibalo nagdetalye nga kinahanglang ipa-inspeksiyon sa mga guest ang ilang mga butang sa dili pa sila mo check-out.
Gisugdan usab gilayon ni Eslaw ang iyang gimbuhaton. Ang matag guest nga mo-check out iyang inspeksiyonon aron pagsuta kun wala ba niini hiposa ug dad-a ang bed sheets sa lawak nga giokupar niini.
Nianang pagka kaadlawon, nakita ni Eslaw nga may guest nga miduol sa counter aron magpa-check out. Nahinumdom si Eslaw nga sayo kining mi-check in kagabii nga may kuyog nga babaye. Apan karon nagbinugtong na lang kini. Hain man kaha ang kauban niining babaye? Nakapangutana si Eslaw sa kaugalingon.
Unya kalit lang misiga ang mga mata ni Eslaw dihang nakita niya ang tawo nga nagpa-check out sa counter may gisipitan sa pag-ilok nga panapton puti. Misantop gilayon sa iyang hunahuna nga basin og bed sheets ang gisipitan sa maong guest. Mao nga dihang mipaingon na kini sa pultahan aron mogawas, gibabagan kini ni Eslaw.
"Excuse me, Sir," ni Eslaw pa. "Puyde nga atong tan-awon kanang imong gisipitan?"
"U-unsa?" Daw nakugang ang lalaki. "Pero ngano man?"
Uso man gud ang kinawatay sa bed sheets dinhi. Mao nga amo lang sutaon kun dili ba bed sheet kanang imong gisipitan."
"Ayaw nalang kini tan-awa. Dili lagi kini bed sheet."
Nasabot ni Eslaw nga daw buot ilikay sa lalaki ang gisipitan niini gikan kaniya. Nagduda na hinuon siya nga bed sheets gayod ang panaptong puti nga gisipitan sa lalaki. Mao nga gikalit kini niya'g ilog ug gibukhad. Apan naniga ang iyang mga mata dihang iyang nasuta kun unsa kadtong panapton nga gisipitan sa lalaki.
"Uy," ni Eslaw pa. "Dili man gyud diay kini bed sheet."
"Giingnan ko bitaw ikaw nga dili," matud sa lalaki. "Dili ka gyud motuo."
"Sige, Padre," ni Eslaw nga kakataw-anon." Pil-a na la’g balik kining imong sotana."
Namingaspingas ang nawong sa lalaki nga midawat sa panaptong puti nga gitunol ni Eslaw. Gidali niinig pilo ang panapton ug gisipitan sa may ilokan dayon milakaw kini paingon sa gawas. Igo lang misunod pagtan-aw si Eslaw niini. Nakapanglingo siyang nagtan-aw sa panapton nga gisipitan niini. (Kataposan)