Nagtakoban nga pagbati

Gula 40

“Wala ko makagusto sa gibuhat ninyo ni Allan kagabii,” ni James pa.

Nakugang si Denia sa gisulti sa lalaki.

Gitutokan ni Denia si James. Buot niyang basahon ang hunahuna niini. Nasuta niya nga seryoso ang lalaki sa gisulti niini kaniya. Mikunot ang iyang agtang. Ingon sa dili siya makatuo sa iyang nadungog.

“May makapakugang ba sa akong gisulti?” Sukit ni James.

Wala siya motingog.

“Gusto lang kong masayod ka nga dili na ko gustong makita kang makigsulti ni Allan,” pintok nga pamulong ni James.

“U-unsa?” Nakugang si Denia.

“Klaro man tingali ang akong gisulti? I think, dili na kinahanglang sublion ko pa kini aron imong masabtan pag-ayo.”

“Pero sa unsang katarongan nga imo kong did-an sa pagpakigsulti ni Allan? Daotan ba diay kun makigsulti ako kaniya?”

“Para tingali nimo, dili. Apan para nako, daotan. Lain kaayong hunahunaon ilabi na kun magsulti kamo atol sa mingaw na kaayong kagabhion.”

“Malisyoso ka lang tingalig hunahuna?”

“Si bisan kinsa nga makakita og malisyosong talan-awon makabaton gayod og malisya sa hunahuna.” Mitaas ang tingog ni James.

Nakasabot si Denia nga ingon sa naglagot kini sa iyang pagtubag-tubag. Usa lang siya ka sulogoon ug wala siya sa posisyon aron mangahas pagpakiglantugi sa anak sa iyang mga agalon. -- Sumpayan pa