Gula 15
“Tinuod kana kun tukion pag-ayo, mahimong dili na niya pangunayan ang pag-asikaso ang iyang gimbuhaton tungod kay gawas nga siya mismo ang tag-iya sa Golden Gate Business Ventures, Inc., siya pa gayod ang chairman niini. Pero kugihan gyud si Sir Manolo. Mas ganahan siyang magtrabaho kay sa magpuyo lang dinhi sa balay. Labina karon nga wala pa gihapon mobalik og report si James sa ilang buhatan.”
Wala na motubay si Denia sa ulahing gisulti ni Nang Luding. Gitabangan na niya ang lagas sa pagpanglimpiyo sa mga butang sa sala.
“May gitugon ra ba diay tuod si Allan nako bahin nimo,” ni Nang Luding pa nga ingon sa diriyot na makalimot nga may angay diay kining itug-an kang Denia.
“U-unsa man kana, Nang?” Sukit ni Denia.
“Giingnan ko niya nga ipapangutana ka kun wala pa ba kunoy hinigugma.”
“H-ha?”
“Mora’g nakagusto kanimo si Allan. Aw, ambot lang. Pero nagtuo kong wala ko masayop. Nadani gyud sa imong katahom si Allan.”
Nakapahiyom si Denia sa gisulti ni Nang Luding. Apan wala siya’y interes sa pangagpas sa lagas nga nakagusto si Allan kaniya. Kun tinuod man kini o dili, wala na siya’y kaikag pang motuki niini.
“May hinigugma ka na ba Day?” Sukit ni Nang Luding kaniya.
“Duna kaniadto, Nang,” laktod niyang tubag. “Ang una, si Efren, nagluib sa among relasyon. Ako siyang gibuwagan sa dihang akong nadiskubrehan nga may laing babaye diay siyang gikabuangan. Ang ikaduha mao si Jonas. Bag-o lang ming nagkabuwag. Way suwerte ang among gugma kay gipikot man siya sa babaye nga ila ra usab nga silingan nga dugay nang nakagusto kaniya.” -- Sumpayan pa