Gula 42
Nabalaka si Abigail sa nahitabo kang Michael. Bisan wala siya mahigugma sa ulitawo apan sa ngalan nga iya kining boyfriend, naluoy siya niini. Tungod tingali kay duna man sab silay escapades together.
Sulod sa classroom, wala mahimutang si Abigail. Wala masulod sa iyang alimpatakan ang gileksiyon sa ilang instructor. Ang iyang hunahuna didto ra kang Michael. Gusto siyang magsusi sa kahimtang niini.
Pag-abot sa iyang vacant period, midalikyat si Abigail ngadto sa ODH aron pagsusi sa kahimtang ni Michael. Padayon pang giatiman si Michael sulod sa emergency room. Ang mga ginikanan ug igsuon ra sa ulitawo maoy iyang gikasulti. Nagpakita sila’g maayong pagtagad kaniya.
“Ikaw diay si Abigail nga hinigugma sa among anak?” Ang inahan ni Michael maoy nangutana.
“O-oo,” may kataha ang tingog ni Abigail. “A-ako.”
“Maayo kay mianhi ka gyud sa ospital ug nahimamat ka namo,” nagkanayon ang amahan ni Michael. “Nalipay mi nga nahimamat ka na gyud namo.”
“Kanunay kang hisgotan sa among anak,” gikan sa inahan ni Michael. “All praises siya nimo. Buotan ka kuno kaayo.”
Igo lang mipahiyom si Abigail sa iyang nadungog.
Nakahukom si Abigail nga dili na lang siya motambong sa iyang mga klase nianang adlawa. Hulaton niya ang resulta sa pag-atiman sa mga doktor kang Michael. Nakig-bonding siya sa mga ginikanan ug igsuon ni Michael.
Dihang naudto, migawas na ang doktor nga nag-atiman ni Michael. Nalipay sila kay gitug-an sa doktor nga luwas na si Michael sa makuyaw nga kahimtang. Si Abigail ingon sa naibtan og tunok. Apan dili pa puwedeng pakigsultihan ang pasyente. Nagkinahanglan pa kini’g igong pahulay.
Pagkaugma sa buntag, gitugotan na sa doktor ang mga tagtungod nga makigsulti kang Michael. Lakip usab si Abigail.
“M-maayo kay nia ka,” bisan luya pa apan nagpahiyom si Michael nga nakakita kang Abigail nga nag-apong niini.
“Nabalaka ko sa nahitabo nimo,” nagkanayon si Abigail. “Pero luwas ka na sa kakuyaw. Pagpakaayog dali.”
“Oo,” ni Michael pa. “Tungod nimo magpakaayo ko’g dali.”
Gikan sa ospital, milahos na si Abigail sa tulonghaan.
“Kumosta na si Michael?” Nangusisa si Harvey dihang nagkasulti sila. “Luwas na siya sa makuyaw nga kahimtang,” tubag ni Abigail.
Kalit naputol ang ilang panagsulti dihang miabot si Krista. -- Sumpayan pa