Gula 41
Nakamatikod si Abigail nga gitutokan siya ni Harvey. Dihang gitan-aw niya ang ulitawo, nagkatinutokay sila. Si Abigail ang unang nibawi sa iyang panan-aw. Miduko siya sa atubangan ni Harvey.
“Kun mao kana,” ni Harvey pa. “Dili diay tinuod ang imong giingon kaganina nga nagmalipayon ka sa relasyon ninyo ni Michael kay laing lalaki man diay ang imong gihigugma.”
“Nagmalipayon gihapon ko kay nagbinuotan man si Michael sa among relasyon,” kadali rang nakabunlot og taphaw nga pagpasabot si Abigail aron pagtabon sa tinuod. “Nasayod kong gibuhat sab niya ang tanan aron ako siyang higugmaon. Ugaling lang kay lisod tudloan ang kasingkasing.”
“Kinsa man diay ang lalaki nga maoy matuod mong gihigugma? Nakaila ba ako kaniya?”
“Sorry, di ko kini ikatug-an nimo. Mauwaw ko.”
“Pagkasuwerte sa maong lalaki nga maoy imong gipili nga higugmaon.”
“Demalas hinuon siya kun ako pa sab ang iyang gihigugma.”
“Ngano man?”
“Tungod kay di mi pareson in many aspects. Sa kahimtang, sa personality, bla-bla-bla...”
Wala na motubay si Harvey sa gisulti ni Abigail.
“Ang babaye nga maoy matuod mong gihigugma maoy suwerte kun kamo pay nagkarelasyon,” ni Abigail pa. “Nakaseguro kong magmalipayon gyud siya sa inyong relasyon.”
“Buhaton ko gyud ang tanan aron siya malipay,” ni Harvey pa. “Unta magkahigugmaay gyud kami sa umaabot nga mga adlaw.”
“Ayaw na lang hunahunaa ang maong babaye, Harvey. I-concentrate na lang ang imong hunahuna kang Krista. May dako ka nang kaakohan kaniya karon nga nagsabak na siya sa inyong anak. Kinahanglang bangonon mo ang iyang kadungganan nga imong gipukan.”
“Di pa ko andam magminyo. Ug wa ko’y planong pakaslan si Krista.”
Dihang lawom nang gabii, gipapauli na ni Abigail si Harvey. Misulod dayon siya sa iyang lawak dihang nakalakaw na ang ulitawo. Mihigda dayon siya. Pero lapas na sa tungang gabii dihang nakatulog siya.
Pagkaugma, sa iyang pagsulod sa school campus, maoy misugat kaniya ang daotang balita. Naaksidente si Michael. Nabiktima kini sa sakyanan nga hit-and-run. Talandogon ang kahimtang niini sa ODH. -- Sumpayan pa