Gula 39
Nakasabot si Abigail nga may problema si Harvey maong iya kining gisukitsukit. Si Harvey mitug-an kaniya sa dako niining problema.
“Mabdos si Krista,” padayag ni Harvey ngadto kang Abigail.
“U-unsa?” Nakugang si Abigail.
“Mao kini dako kong problema karon. Gusto ni Krista nga akong bangonon ang iyang kadungganan.”
“Mao gyud kanay angay mong buhaton, Harvey.”
“Pero dili pa ko andam magminyo. Gusto kong makatapos una sa akong pagtuon. Seguradong masuko ang akong parents kun masayod sila nga nakadisgrasya ko’g babaye.”
“Unsa man diay imong plano karon?”
“Naglibog ko. Wa ko masayod kun unsay angay kong buhaton.”
“Kun ako’y pangayoan mo’g opinyon, mas maayong bangonon gyud nimo ang kadungganan ni Krista. Imo man nang gituyoan kay gihilabtan man nimo ang iyang pagka-babaye.”
“Igo lang kong mibarog sa akong pagka-lalaki. Siya man maoy una-unahon kaayo. Maong akong gipatolan.”
“Di kana ang importante sa pagkakaron. Ang mahinungdanon mao nga di ka motalikod sa imong responsibilidad ngadto niya.”
Nahilom sila’g makadiyot. Ug dihang gipadayon nila ang panagkabildo, lain na ang tema nga ilang gihisgotan.
“Kumosta na man mo ni Michael?” Nangutana si Harvey.
“Okey lang,” mubong tubag ni Abigail.
“Malipayon ka ba sa inyong relasyon?”
“Nganong nakapangutana ka man og ingon niana?”
“Gusto lang kong masayod.”
“Malipayon ko sa relasyon namo ni Michael. Buotan ug mapinanggaon kaayo siya. Wa ko’y ikasaway ni Michael.”
“Diay ba? Kun mao kana, maayo ka pa kay nagmalipayon ka man diay sa imong love life.”
“Ikaw diay? Wa ka ba diay magmalipayon sa relasyon ninyo ni Krista?”
“Di mahitabong magmalipayon ko sa among relasyon. Alang nako, usa ka hikog ang akong pagpakigrelasyon kaniya.”
“Nganong nakasulti ka man og ingon niana?”
“Nagmahay ko kun nganong miabot si Krista sa akong kinabuhi.” -- Sumpayan pa