Gula 29
Gitutokan ni Abigail si Harvey. Gusto niyang tugkaron ang logic sa gisulti sa ulitawo kaniya.
“Di ko gustong magdako ang away ninyo ni Krista, Abigail,” mipasabot si Harvey. “Di ko gustong masubli pa ang iyang pagpasakit nimo.”
“Wa man ko mangaway ni Krista, Harvey,” nagkanayon si Abigail. “Siya ra man ang mora’g dunay kayugot nako.”
“Nasayod ko niana. Insecured si Krista nimo. Ug samtang di pa matinuod ang iyang pangangkon nga may relasyon kami, nagtuo ko nga di siya mohunong sa pagsamok nimo.”
“U-unsa?”
“Mao kana, Abigail. Maong nakadesisyon ko nga tinud-on na lang gyud ang pagpanguyab niya aron magmalinawon na siya.”
“Aw, ikaw ang mag-igo, Harvey. Nahigugma ka man sab kaha niya?”
“Wa koy pagbati bisan gamay na lang alang kaniya. Siya ray dako’g gusto nako. Siya ray nagtinguha nga magkarelasyon kami. Gani, nag-una-una na man siya’g panabi nga may relasyon kami bisan wa pa ko manguyab niya. Ambot kun unsang klaseha sa bakukang ang misulod sa iyang utok?”
“Kun tinud-on mo man gani ang pagpanguyab niya, ayaw gyud siya pasakiti, Harvey. Hinuon tun-i ang imong kaugalingon paghigugma kaniya.”
“Mora’g lisod higugmaon si Krista alang nako. Big turn-off para nako ang iyang pagka-flirt. Hilasan ko. Kun manguyab man ko niya, kana tungod kay gusto kong ipakita nimo nga andam kong magsakripisyo alang sa atong panaghigala. Di ko gustong magsamok pa si Krista nimo.”
“D-daghang salamat, Harvey. Ug panghinaoton ko nga sa kadugayan makakat-on ka sa paghigugma kang Krista ug magmalipayon ka sa inyong relasyon.”
Human sa panagsulti nila ni Harvey, misulod si Abigail sa iyang lawak. Didto gipahungaw niya ang naghuot sa iyang dughan pinaagi sa paghilak. Natay-og ang iyang abaga sa sagunson nga pagbakho.
Hingpit na gyung nahanaw ang iyang paglaom nga maangkon ang gugma ni Harvey. Si Krista na gyud maoy makatag-iya sa gugma niini! Gisakitan siya.
Pagkaugma, pagsulod ni Abigail sa tulonghaan, nakita niya sila si Harvey ug Krista nga nagsultihanay sa gawas nga bahin sa audio-visual hall. Nakasabot dayon siya sa kahulogan sa iyang nakita. Gilainan siyang nagtan-aw sa duha. Midali siya pagbalik sa iyang agi samtang wala pa sila makakita kaniya. -- Sumpayan pa