Tungod lang sa selos

Nakapatay si David sa iyang silingan tungod sa selos. Ang napatay suod silang managhigala. Guwapo man god kini si David. Sa kadaghan sa babaye nga naibog kaniya, ang asawa pa gayod sa iyang higala.

Maanyag ang asawa sa iyang higala ug siya si David ang gidudahan nga kabit. Pero, ang tinuod wala gayod si David mahigugma. Apan, naay mga tawo ang nag-ingon nga dunay relasyon si David ug ang asawa sa iyang higala.

Usa ka adlaw niana samtang naglakaw si David padulong sa ilang opisina, gitawag siya sa iyang higala nga si Eric.

"Bay David," pulong niini ngadto kang David. "Ulitawo ka pa busa ayaw panghilabot sa asawa sa imong higala. Pangitag lain kay basin kun magka deperensiya unya kita."

"Kay kinsa man ang nagsulti kanimo nga gikabit ko ang imong asawa?" ni David nga medyo gibati og kahadlok tungod sa gipakita nga taras sa higala. "Dili kana mahimo nako. Kun ako ang mangabit, kinahanglan pilion ko ang babaye nga walay problema."

"Bay, makadungog pa gani ako nga ikaw ug ang akong asawa, dunay relasyon, dili ka lang magmahay."

Apan, si David wala gayod maghunahuna nga kabiton ang asawa sa iyang higala. Tinuod, guwapa ang asawa sa iyang higala, apan, duna na kiniy anak kang Eric. Tinuod didto sa opisina, nagkasultihanay sila dihang nagkasugat sila nga nangita kang Eric. Apan, mao ra kadto. Hinuon, sa tinan-awan sa asawa ni Eric ngadto kang David, mora ba kun nagdalag "Come here" apan, wala kini panumbalinga ni David kay labot pa, hapit na usab sila kasla sa iyang hinigugma.

Apan, usa ka adlaw samtang si David naa sa iyang opisina, gitawag siya sa ilang security guard kay duna kunoy babaye nga nangita kaniya. Sa pag-adto ni David aron pagsuta kun kinsa ang nangita kaniya, iyang nasayran nga ang nangita mao ang asawa ni Eric. Tinuod nagkasultihanay sila sa opisina. Unya kalit mibutho si Eric. Daw nagdilaab sa kalagot ang mga mata niini ug dayong suntok kang David.

"Tinuod gayod diay nga duna kamoy relasyon. Mga animal! Dili kamo angay nga mabuhi ning kalibotan," ni Eric nga milanit sa usa ka mahait nga hinagiban. "Patyon ko kamong duha."

Walay nahimo si David niadtong higayona kun dili mao ang pagpanalipod sa iyang kaugalingon. Ang nakapabukal kaha sa dugo ni Eric kay ang iyang asawa, adto man hinuon mogakos kang David imbis kaniya.

Unya usa ka dunggab ang mitama sa dughan sa asawa ni Eric hinungdan nga misarasay kini hangtod nga nakabsan sa kinabuhi. Unsa pa man kaha ang mahimo ni David niadtong higayona, iyang giilog ang armas sa security guard ug dayong luthang sa iyang higala nga si Eric.

Maayong pagka igo sa dughan ni Eric hangtod nga sama sa iyang asawa, nakabsan usab sa kinabuhi. Walay nahimo si David gawas sa pagtahan sa iyang kaugalingon ngadto sa mga sulugoon sa balaod.

Sulod lang sa tulo ka bulan, natanggong sa bilanggoan si David. Maayo nalang kay wala ihikaw sa iyang pagtabang ang security guard nga diha sa panghitabo. Nahimo kining saksi nga si David walay sala sa nahitabo.

Nahukman lang si David sa usa ka tuig ug tulo ka bulan.

Ang giplano unta nga pagpakasal niya sa iyang hinigugma, nauktaba tungod sa iyang pagkabilanggo. Hinuon, nagpabilin ang matam-is nilang relasyon taliwala nga siya naa sa prisohan.

Apan, wala palandonga nga ang igsuon ni Eric nga nagdumot usab diay kang David ug tungod niini, gusto niyang patyon si David. Maayo na lang kay dihang luthangon na unta niini si David, ang higala ni David ug kauban niya sa trabaho ang mipugong. Wala maigo si David gikan sa pihong kamatayon.

Sa buhatan sa hepe sa kapolisan, nangayog pasaylo kadtong tawo nga buot untang mopatay kang David. Ang Hepe sa polis maoy nagpasabot niini nga si David, nahukman sa sala nga iyang nahimo batok sa balaod busa usa ka dakong sayop ang mopasakit niini atubangan sa atong balaod. Nakasabot ang igsuon ni Eric ug mipasalig nga dili na niya himuon ang pagpatay kang David. (Kataposan)