Akong hinagdaw nga Valentina

Abi nako’g maapil ko sa Firing Squad. Petsa 14 na, wala gayo’y nahisalaag. Paita ining sige lang tag-inom sa Valentine's. Apan atong petsa 13, diha na ta to si  Inday Julia, ang antique namong silingan, pero mikubol gihapon ang akong dila.

Sa dihang gigunitan ko na ang iyang kamot ug mosulti na unta ko sa "I love you!" lain may akong nasulti. Nakaingon man kog "Unsa nang orasa diha?" Tam-isa ra bas pahiyom ni Inday Julia. Sayanga uy!

Ambot hain ko liwat, ang akong igsoon nga medyo hiwi og panan-aw, guwapa man kaayo og asawa? Si Poldo among silingan nga medyo may pagkakimpang, nakadagit man og tindera sa SM?

Ngano sad ning akong kulba maabot man dayon kun naay dalaga nga mopaduol nako? Puwede bag MU na lang ta? Miingon sab akong agaw, dili hangtod sa hangtod magsilbi ang MU. Moabot man gyud ang panahon nga mag-istoryahay mo bahin sa inyong pagkabutang?

Kinsa bay nag-imbento aning gugma? Bitaw no haig wala na lay uyabay diretso na lang!

Karong gabii mosuroy lang gihapon ko. Solo. Daghan man pod magsuroy-suroy sa Plaza nga walay uyab. Sayo sa gabii ako nagpula og t-shirt. Nagkalidades ang mga nawong. May bati duna poy arangan. Syaro. Sayang si Piolo.

Duol duol may nagwara-wara sa iyang kamot. Ehem!

"Maam ikaw diay ni? Gud evening. My favorite teacher!" Si Maam, akong maestra sa 2nd year high school ug dugay na kaming wa magkita. Nag-eyeglass gihapon og baga ug guboton og buhok.

Apan very intelligent kini ug nag-masteral pa. Medyo budlot ang ngabil apan pula daw kamatis.

"Gervacio, what are you doing here?

"Nangita og Valentina, Maam!" Diretso ko’g tubag.

Miluray ang iya mga mata ug nangita dayon kami og lingkuranan kay tiaw mo’g kalisud nga mag-istoryahay og pila ka libro.

Halayo kaayog naabot ang among kukabildo. Naabot mi sa Russia, ang pagpanikas sa mga politiko sa eleksyon ug ang tambal sa baho og baba. Unsay rason ngano nag-rebolusyon ang Tsina. Si Mao Zedong aduna diay daghan nga asawa. Si Marcos, unsa kahay nahitabo sa Pilipinas kun nagpadayon ang martial law hangtod karon?

"Maam alas dose na, happy Valentines!"

Nakahagdaw gyud! Si Maam karon atua sa among balay ... kay ako man gyud siyang naasawa kay di naman siya mouli sa ila, kay strict man ang parents nya! Ngeekk! (Kataposan)