Gula 41
Kalit lang kaayo kong gikulbaan pagkamatikod sa patrol car nga nagsunod sa among luyo. Misantop sa akong hunahuna nga tingalig nadiskobrehan dayon nila ang krimen nga akong gibuhat didto sa Vallecera Centrum.
Apan si Bredhart ingon sa wala lang mabalaka. Wala siya’y kurat! Mipadaplin hinuon siya’g diyotay aron paghatag og lugar sa patrol car nga maka-overtake. Dihadiha milusot sa pag-overtake ang patrol car ug tulin kining miuna kanamo nga kusog kaayong nagdagan.
“Huh!” Nakatuaw ko nga morag naibtan og tunok. “Abi ko’g ako nay tuyo sa mga polis nga nagsakay niadtong maong patrol car.”
“Gikuyawan ka diay!” Sukit ni Bredhart samtang nagpadayon pagmaneho sa among gisakyan.
“Oo, uy. Abi ko’g masakpan na ko sa mga polis.”
“Coincidence lang to. Naatol lang tingali nga may gitubag sab nga alarma ang kapolisan mao nga nasundan nila ang atong gisakyan.”
Pag-abot sa unahan, miliko mi sa laing dalan. Makadaghan mi maglikoliko sa lainlaing mga dalan hangtod nga mao nay among gisubay ang dalan paingon sa bukirang bahin sa siyudad sa Obic diin nahimutang ang balay sa lider sa mga vigilante nga si Fernan.
Nianang pagkagabii, dihang mingaw na ang palibot, migawas ko sa akong lawak. Miadto ko sa lawak ni Fernan. Sirado ang pultahan mao nga nanuktok ko’g hinay. Wala dangtig duha ka gutlo, naabli ang pultahan.
“Maayong gabii,” giingnan ko si Fernan.
“M-maayong gabii sab,” tubag si Fernan.“Unsay ato?”
“Mahimo bang mosulod unta ko?”
Gipasulod ko ni Fernan. Gitak-opan dayon niya ang pultahan.
“Abi ko’g natulog ka na,” niya pa.
“Wa pa ko makatulog,” tul-idkong tubag. “Gusto kong paambitan sab kanimo ang gibati kong kalipay karon.” -- Sumpayan pa