Gula 25
Gipadayon nako ang pagtug-an ngadto kang Fernan ang background ug impluwensiya sa pamilya sa mga lalaki nga mi-gang rape nako.
“Kana si Kurt Tumelden, nako pa. “Mao nay labing suod ni Sheldon. Anak kana siya sa city administrator sa siyudad sa Lumantaw.”
“Kini si Verle Juizo?” gikan ni Fernan.
“Anak gihapon siya sa usa ka respetadong banay. Tag-iya sa usa ka luxury car distributor company ang iyang mga ginikanan.”
“Ngilngig man diay og background ning mga tawhana.”
“Tinuod kana. Si Ervin Padios anak sa tag-iya sa usa ka franchisee bakery dinhi sa Kabisay-an ug Mindanao. Si Lyle Cubillo anak sa usa ka pawnshop owner nga may branches na sa tibuok nasud ug si Karl Padon anak sab sa usa ka tag-iya’g dakong botika nga daghan sab og branches. Siya’y supplier og shabu sa grupo.”
“Ug si Keith Agcaoili?”
“Siya ray pipitsugin sa grupo. Anak sa usa ka polis nga ubos ra’g ranggo. Siya’y sugo-sugoon sa grupo. Usahay, ilang bugalbugalan ang iyang pagkatawo. Hilomon siya. Pero lawom og du’t.”
“Nganong suheto ka man kaayo bahin sa ilang pagka tawo?”
“Tungod kay nakaila ko pag-ayo nila. Classmates ko sila sa college, gawas lang kang Keith. Si Sheldon ug ang iyang mga barkada maoy numero unong badlongon sa among tulonghaan. Pulos sila wala makahuman og eskuyla gumikan sa ilang pagkagumon sa ginadiling bisyo.”
“Unsay gusto mong isilot kanila?”
“Kamatayon!”
“Maglisod ka, Sandra. Daghan sila.”
“Dili ko sila dunganon sa pagpatay, Fernan. Tagsatagsaon ko sila sa pagpaningil aron matagbaw ko sa akong pagpanimalos.” -- Sumpayan pa