Ang tawo nga nakasulod sa akong lawak mao kadtong lalaki nga nakigsulti kanako sa makadiyot kaganina ug migawas dayon sa lawak aron makapahulay ko'g maayo. Karon misulod siya'g balik nga may dala nang mga pagkaon. Gipahimutang niya sa lamesita ang mga pagkaon ug gipaduol sa akong gihigdaan. Iya kong gipahiyoman.
"Sorry nga natugaw ko ang imong pagkatulog," niya pa.
"Okey lang," gikapyotan pa gihapon sa kaluya ang akong tingog.
"Kaon na. Nag-ingon ra ba si Boss nga ipaatiman ka'g maayo aron mabalikan na sa kabaskog ang imong lawas."
"K-kinsang Boss?"
"Ang giila namong lider sa pundok."
"P-pundok?"
"Oo. Duna miy pundok."
"U-unsang pundoka?"
"Dili lang una ko motubag nimo bahin niana. Si Boss ray mopasabot nimo sa tanan. Sa pagkakaron, maoy hunahunaa kanunay nga dili ka angay mahadlok namo kay dili mi daotang tawo."
Wala ko motingog. Mipitok-pitok lang ang akong mga mata nga mitutok sa kisame. Morag naglutawlutaw ang akong hunahuna.
"Kaon na aron molagsik kag dali," matud sa lalaki. "Makigsulti na si Boss nimo kun lagsik ka na unya."
Sanglit dili pa man ko makahimo pagbangon, gihungitan ko sa lalaki aron ako makakaon. Mibati ko'g diyotay'ng kaulaw nga gipakaon sa lalaking wala nako mailhi. Apan giwakli ko ang kaulaw kay na-realize nako nga kinahanglang magpakabuhi ko. Kinahanglang maka-survive ko.
Mikaon ko'g maayo pinaagi sa paghungit sa lalaki kanako. (Sumpayan pa)