Gula 56
(Kining maong nobela gibase sa matuod nga kaagi ni Dinah).
Sa dayon nang larga ni Rex paingon sa Cebu, gisipong nila ni Dinah ang nindot kaayo nilang mga plano alang sa kaugmaon.
“Kun may igo na unya kong tinigom nga kuwarta sa banko,” ni Rex pa, “gusto kong magminyo na ta, Din.”
“Uyon ko sa imong plano,” matud ni Dinah. “Total, naa na man ta sa saktong pangedaron.”
Sa didto na si Rex sa Cebu, walay puas ang pagpadad-anay nilag sulat sa usag-usa. Sa ilang mga sulat, maoy kanunay unod ang pagpangumostahay sa usag-usa ug ang pagsubli-subli sa ilang mga saad ug panumpa.
Si Dinah ingon sa naleksiyon sa failure sa ilang affair ni Padre Gio. Mora’g gusto na siyang mag-going straight sa iyang kinabuhi.
Nanglabay ang mga adlaw. Nagpadayon ang daily routine ni Dinah isip magtutudlo sa Bakhaw Elementary School.
Namatikdan ni Dinah nga panagsa na lang mosulat si Rex kaniya. Ubay-ubay na gani ang gipadala niyang mga sulat nga wala balosi niini. Apan wala magtanom og katahap si Dinah sa iyang hunahuna. Nagtuo siyang busy kaayo si Rex sa trabaho maong wala na kini panahon pagpakig-communicate kaniya. Maong wala lang niya hatagi’g daotang kahulogan ang wala na pagsulat ni Rex kaniya. Nagsige lang gihapon siya’g padala og sulat ngadto kang Rex bisan wala na kini balos-balos sa iyang mga loveletters.
Hangtod nga usa ka adlaw niana, nabalitaan ni Dinah nga mipauli diay si Rex sa barangay Bakhaw apan wala kini makigkita kaniya. Mibati siya’g kahiubos sa gibuhat sa iyang boyfriend. Apan ang nahiubsan pag-ayo ni Dinah mao ang iyang nasayran nga mipauli lang diay si Rex sa Bakhaw aron pagkuha sa mga ginikanan niini. Nakabaton diay si Rex og relasyon sa usa ka babaye didto sa Cebu ug gitakda na ang ilang kasal! -- Sumpayan pa