Gula 149
Nahibulong ko sa mga lihok ni Davon. Mao pa ganiy iyang pag-abot sa balay apan morag nagdali siyang makalakaw pagbalik.
"May dinalian kong lakaw," mipasabot si Davon. "Ikuyog ko sa akong boss ngadto sa Baguio."
"Mag-unsa man mo didto?" Nangusisa ko.
"May importanteng business meeting siyang tambongan."
"Karon ba dayon mo nga mogikan?"
"Oo. Nagpaabot na si boss nako didto sa iyang office. Mao nga andama dayon ang akong mga dad-onon. Isulod sa travelling bag."
Mikiros pag-ilis si Davon. Nagdali-dali sab kog panghipos sa dad-on niyang mga ilisan. Tulo ka karsones, tulo ka T-shirt ug tulo sab ka polo. Gipadad-an ko sab siyag unom ka brief. Gisulod ko ang tanan sa bag.
"Ikaw nay bahala dinhi samtang wa ko," nagkanayon si Davon nga misul-ob sa jacket nga gisapaw sa polo nga iyang gisul-ob.
"Kanus-a man mo mopauli dinhi sa Manila?" Nangutana ko.
"Dili pa maseguro. Manawag lang unya ko nimo sa long distance aron ka mahibawo."
Mikuot si Davon sa iyang pitaka og miihap og pipila ka tinag P1,000 tibuok nga kuwarta. Gitunol kini niya kanako.
"Ang imo ning allowance," niya pa.
Gidawat nako ang salapi. Ug human makahalok sa akong aping, mibiya na siya sa apartment nga among gipuy-an.
Nag-inusara kong nanihapon.
Nakahunahuna kong manawag kang Ferdinand aron magkita mi. Pero nausab ang akong hunahuna. Tingalig manawag si Davon inigkagabii ug masuko kini kun dili nako matubag ang telepono kay wala ko sa balay. Dili ko gustong magbaton og katahap si Davon nga duna koy gitagoan kaniya.
Nianang pagkagabii, mitan-aw kog salida sa telebisyon taghulat sa katulogon. Nagpaabot sab ko nga basin manawag si Davon. Pero hapit na lang mag-alas 10 sa gabii wala gayod mobagting ang telepono. Misulod na lang ko sa lawak kay gibati ko na ang katulogon.
Pagka ugma, mao pa ganiy paghuman nakog kaligo, may nag-buzzer sa pultahan sa apartment. Gidali ko kini pagsusi aron akong masayran kun kinsay naa sa gawas. Wala man koy gipaabot nga bisita.
Pagtukas nako sa palid sa pultahan, mibantang sa akong atubangan ang bayhon sa usa ka lalaking nagbarog sa gawas sa pultahan. (Sumpayan pa)