Gikubkob sa ungo ang iyang hinigugma

Wala na tingali makatupong sa pagminahalay nila ni Rodel ug Amay dinhi sa balangay sa San Nicolas. Grabe gyud hinuon ang ilang duha ka pagbati kay nagsukad pa kini sa elementarya pa sila.

Karon nga high school na sila, mao lang gihapon ang kadalisay sa ilang pagminahalay. Gani, duna man sila’y abotanan ug kini mao ang lingkoranang bato nga dili layo sa tampi sa lawom nga bung-aw. Matag hapon gyud nia sila dinhi, ug unya ilang subli-sublion ang ilang mga saad ug panumpa nga kamatayon ray utlanan sa ilang pagminahalay.

“Del, molarga ka man kuno sa gawas,” ni Amay pa nga mibalikos sa tuong bukton niini sa hawak sa ulitawo.

“Oo, kay gusto ko nga makatigom og igo-igong kuwarta aron kun duna ko’y matigom magpakasal ta, Amay,” iyang gikuptan ang aping sa dalaga. Mipahiyom si Amay. Daw nalipay kay mao say iyang gusto nga mahimo niyang kapikas si Rodel, ang lalaki nga maoy gipakamutya sa iyang kasingkasing.

“Wa ka kahibawo sa mga tabitabi dinhi, May,” ni Rodel pa nga mitindog gikan sa gilingkorang bato ug unya mipaingon sa tampi sa lawom nga bung-aw. Misunod si Amay.

“Unsa mang tabi-a na, Del?” nangutana si Amay.

“Kaliwat kuno mi’g ungo. Matud pa kadtong namatay nakong amahan namalbal kuno to didto sa Tabok ug maong namatay kay napusilan,” wa motan-aw si Rodel sa iyang hinigugma. “Ang ako sad kunong inahan namatay kay natigbasan didto sa Lawis kay namalbal pud...”

“Nakadungog bitaw ko ana, pero, di ko motuo, uy, ug bisan pa’g tinuod di gyud mausab ang pagmahal nako nimo, Rodel,” ug mibalik paglakaw si Amay paingon sa gilingkoran nilang bato.

Nakalarga gyud si Rodel sa Dubai. Ug didto gidoble niya ang iyang paningkamot ug kakugi. Sa laing bahin balik sa Pilipinas nagmingaw si Amay ug matag hapon moadto gyud siya sa ilang abotanan ni Rodel.

Iyang handumon ang mga higayon nga anaa pa kaniya si Rodel diin maghisgot-hisgot sila sa ilang umaabot. Unya usa ka gabii niana gikang naglakaw ug sa iyang pag-abot sa ilang balay diha sa may pantawan nagpaabot si Gumer.

Taudtaod na kining nangulitawo kaniya. Iya na kining gilikayan. Apan dili gyud mohunong sa pagpangulitawo kaniya. Paglabay sa usa ka tuig miabot si Rodel ug sa iyang pag-abot gisugat siya sa balita nga si Amay patay na. Gilubong na kini sa pag-abot ni Rodel.

Tungod sa kaguol, iyang giadto ang lubong ni Amay ug iyang gikubkob ug gidala niya ang patay’ng lawas ni Amay sa ilang balay bisag may pagka baho ug lang-og na kini. Mihilak si Rodel. Mingaab. Nagsinggitsinggit.

“Magbayad ang mga lampingasan nga nag-among-among nimo Amay! Patyon ko silang tanan!”

Gilugos man god si Amay ug unya gipatay. Ug dunay nakakita sa pagbuhat sa maong krimen, si Inok, ang higala ni Rodel. Nakita niya si Gumer kuyog sa mga barkada niini nga maoy milugos kang Amay nga gikang naligo sa sapa. Ug pagkahibalo ni Rodel nianang pagka-gabii, kalit lang siyang nausab. Gitugkan na siya’g pako ug unya nanag-as ang iyang mga bangkil. Unya mikalit siya paglupad.

Pagkabuntag, maoy nakita sa mga lumolupyo ang mga patay’ng lawas nila ni Gumer nga nawataswatas ang mga lawas.

Pagka buntag sayo ang taga Health Center sa lungsod mianha sa balay ni Rodel aron pagkuha sa patay’ng lawas ni Amay nga puwerte nang bahoa. (Kataposan)