Gula 32
(Kining maong nobela gibase sa matuod nga kaagi ni Dinah).
Dili gustong hatagan og malisya ni Padre Josh ang gipakitang lihok ug tinagdan ni Ma’am Faith kaniya pero dili sab niya ma-discount ang posibilidad nga husto ang iyang katahap. Aware siya niini kay sa iyang kinabuhi isip usa ka pari, dili lang kay kausa ra mahitabo ang ingon niini -- kanang may ma-attract kaniya nga opposite sex!
Usa na niini si Dinah. Labihan kaagresibo si Dinah, mora’g wala na maghunahuna og kaugmaon. Maayo gani kay nagbaton siya’g talagsaong kalig-on batok sa tentasyon sa usa ka babaye!
Ug...si Ma’am Faith! Hilom niyang giobserbahan ug gipanid-an ang lihok sa maong maestra. Hangtod nga iyang nasabtan nga nakagusto gyud kini kaniya. Namatikdan niyang kanunay kining magpa-charming kaniya. Pero wala niya hatagi’g pagtagad si Ma’am Faith. Nangita siya’g paagi nga makalikay sa tentasyon. Gilikayan niya si Ma’am Faith.
Maayong midumala si Padre Josh sa Santa Angela Academy ug sa Santa Angela Parish. Bisan usahay mopatigbabaw ang pagka bugoyon sa iyang lihok apan maayo siya’g gawi. Maong bisan dayag sa mga mata sa katawhan ang iyang pagka sugarol apan gi-tolerate kini sa mga parokyano tungod sa iyang kabuotan. Kadali ra siyang naka-establish og maayong relasyon sa katawhan sa lungsod sa Dalisay. Duol siya sa kasingkasing sa katawhan.
Siya ray pari nga nadestino sa Santa Angela Parish nga mobunyag, mokasal ug momisa sa patay nga walay bayad. Wala niya pasidak-i ang programa sa Simbahan sa kanunay nga pagpangolekta’g donasyon. Misimpatiya siya sa kinabag-an sa mga parokyano nga mga kabos og kahimtang.
Apan usa ra ka tuig si Padre Josh sa Santa Angela Parish. Pagtangkod niyang usa ka tuig sa maong parokya, gibalhin siya sa parokya sa laing lungsod. Nawili kaniya ang katawhan sa Dalisay. Labina gyud si Ma’am Faith. Labaw sa tanan, si Dinah! -- Sumpayan pa