"Diha ka lang kutob sa imong gibarogan, Bradley," pasidaan ni Dirk. "Pusilon ko ikaw kun magpakita kag daotang lihok."
"Kinsay hadlokon mo nianang gigunitan mong armas, Dirk?" Nagkatawa si Bradley. "Ikaw na lang ang nagpabiling nagbarog. Gipatay ko na ang mga polis nga nagbantay sa gawas. Ug ikaw na ang sunod. Kuhaon ko si Ingrid gikan kanimo."
Dihang milakang si Bradley paduol namo, gipusil dayon kini ni Dirk. Naigo si Bradley. Nahagba kini sa salog. Apan pagkataudtaod, mibangon kini. Dihang nakatindog na, mipadayon kini paglakaw paduol kanamo. Wala mi makalihok.
"Dili makapatay nako ang inyong armas," matud ni Bradley dihang nahiduol na siya kanamo. "And you can't stand with me."
Gihukas ni Bradley ang sinina nga iyang gisul-ob. Ug naniga ang among mga mata sa among nasaksihan. Nakita namo nga nanggawas ang mga bala gikan sa mga samad sa dughan ni Bradley. Unya naalim ang iyang mga samad.
"Padaplin, Ingrid," matud ni Dirk nga kalit lang kaayong miwakli nako.
Abtik kaayong milihok si Dirk. Gidasmagan dayon niya si Bradley. Iya kining gipahamtangan sa iyang kasuko. Naigo si Bradley sa makusog niyang kinumo ug patid. Apan si Bradley mipakita og kalig-on. Mobangon dayon kini sa matag higayon nga malukapa inigkaigo sa kinumo ug patid ni Dirk.
Misukol si Bradley sa pagpakigtaksanay sa kusog si Dirk. Nagkinulatahay sila. May mga higayon nga malukapa si Dirk nga maigo sa kusog nga sumbag ni Bradley. Apan abtik nga mobangon si Dirk ug daw walay kahadlok nga moharong ni Bradley nga gisudlan sa espiritu nga daotan nga mao ang incubus.
Nagpadyaon ang ilang kinulatahay. Hangtod nga nagunitan ni Bradley si Dirk. Gibanduwa ni Bradley ang akong bana. Mikamang si Dirk. Unya gihapos siya ni Bradley ngadto sa pultahan sa maong prayer room. Naguba ang pultahan. Nalakum-og si Dirk. Gisundan siya ni Bradley nga ingon sa gipanuwayan nag maayo. (Taposon sunod gula)