“Ayaw kamo pagbiya ning dapita,” nagkanayon si Dirk ngadto sa mga kauban niyang polis. “Pangitaa ninyo si Bradley Bagutsay. Ayaw ninyo siya lung-i.”
“Yes, Sir,” hapit magdungan pagtubag ang mga polis.
“Kinahanglang mobalik una ko sa siyudad aron pag-atiman sa akong asawa,” matud ni Dir. “Pahibaw-a ko dayon kun may resulta na ang inyong pagpangita kang Bradley Bagutsay.”
Human kahatagi’g instruksiyon ang mga polis, mibalik si Dirk ug si PO1 Antigua sa sakyanan nga akong nahimutangan. Nanakay sila’g balik.
Dihang nagdagan na ang among gisakyan nga gimaneho ni PO1 Antigua, misugod dayon pagsugilon si Dirk kun giunsa nila pagtultol ang dapit nga gidad-an ni Bradley kanako. Na-recover diay nila ang owner-type jeep nga gi-carnap ni Bradley ug maoy among gisakyan. Gibilin kini ni Bradley sa usa ka hilit nga barangay nga nahisakop sa usa ka lungsod sa amihanang Sugbu. Gikan didto nagbaktas kami si Bradley paingon sa awaaw nga dapit nga iyang gidad-an nako.
“Gisubay namo ang kasagbotan nga inyong giagian gikan sa nahimutangan sa sakyanan hangtod nga nahiabot kami sa awaaw nga lasang diin may karaang balay,” matud ni Dirk. “Human namo masuta nga mao kadto ang gidad-an ni Bradley kanimo, naghimo dayon mi’g plano kun unsaon ka namo pagkuha.”
“Nailad ko ni Bradley, Sweetheart,” nako pa. “Abi ko’g ikaw ang nag-drive sa owner-type jeep niadtong hapon nga iya kong gidagit. Ulahi ko nang nadiskobrehan nga nagmaskara diay siya og sama gyud sa imong panagway.”
“Pagabayaran niya’g mahal ang iyang pagsamok-samok nato,” ni Dirk pa.
Kalit lang mipreno si PO1 Antigua. Diriyot mi si Dirk mahaumod. Gipangutana ni Dirk kun nganong gipahunong ni PO1 Antigua ang sakyanan.
“Tan-awa, Sir, sa unahan,” ni PO1 Antigua pa.
Milantaw mi sa unahan. Ug maoy among nakita si Bradley nga nagbarog sa tunga sa karsada. -- Sumpayan pa