Gula 83
Sumala sa kasayoran nga akong nahipos, giatol gayod ang paghikog ni Tyron sa Disyembre 25 sa nakalabay nga tuig. May suicide note nga nakaplagan sulod sa iyang kuwarto diin nakaplagan ang patay niyang lawas. Sa maong sulat, gibutyag ni Tyron nga ang kapakyasan niya sa gugma maoy hinungdan nga gipangunayan niya’g kutlo ang kaugalingong kinabuhi.
Sa hilom nakonsensiya ko. Ako diay ang hinungdan sa paghikog ni Tyron. Gitanom gayod diay niya sa iyang kasingkasing ang akong pagpakigbulag niya. Gisakitan gayod diay siya pag-ayo sa akong gibuhat. Pero wala man sab god ko magdahom nga mosangko sa pagpinutong niya ang among panagbulag. Gawas pa, wala man sab gyud koy feelings niya.
Bahin kang Harold, nabalitaan ko nga may lain na siyang girlfriend. Gipasagdan ko na lang siya sa iyang kinabuhi. Wala na sab koy planong makig-uli niya. Kay sukad pa sa sinugdan, wala gyud mosantop sa akong hunahuna nga seryosohon ko ang pagpakigrelasyon nila ni Harold ug Tyron.
Nanglabay ang mga adlaw. Ang kahidlaw sa kalipay nga lawasnon kanunay nga naghasol nako. Gipangandoy ko ang kainit sa halok, gakos ug parayeg sa usa ka lalaki nga makatambal sa akong kauhaw sa dugos sa himayang unodnon. Gipangandoy ko ang romansa sa usa ka lalaki nga samag abilidad ni Darwin sa dula sa kama.
Gumikan sa kauhaw ug kahidlaw sa lawasnong kalipay nga nakapasalimuang sa akong galamhan, nakiglambigit ko ni bisan kinsang lalaki. Daw nawad-an ko’g saktong paminsar. Ingon sa nawad-an ko’g kaulaw ug respeto sa akong kaugalingon. Ang mahinungdanon alang nako mao ang pleasure nga akong matagamtaman pinaagi sa sex.
Mao nga kutob sa mokidhat, segurado gyung makaligwat. Nagpatira ko ni bisan kinsa. Lupig pa nako ang usa ka burikat. Mas maayo pa ang burikat kay magpabayad man kun makighilawas sa usa ka lalaki. Mas grabe gyud ang akoa kay ako ra mang ihatag nga libre. Mao nga birada sab taman sa ginhawa ang hangol nga mga lalaki.
Apan sa tanang mga lalaki nga nakatilaw nako, wala gyuy nakatupong sa performance ni Darwin. Mao nga nagpadayon ko sa pagpangita og lalaki nga susama niya’g abilidad. Kanang lalaki nga makahatag nako’g hingpit nga katagbawan sa panaghilawas. Pero wala gyud koy nakit-an. Ambot, morag nag-inusara lang tingali ang matang ni Darwin dinhi sa kalibotan. -- Sumpayan pa