Human sa panagbulag namo ni Harold, nasolo na ako ni Tyron. Hinuon, walay kasayoran si Tyron bahin sa relasyon namo ni Harold. Si Harold ray nasayod nga nakigrelasyon pod ko kang Tyron. Ang nakaayo lang sab ni Harold kay wala na siya magsamok sa relasyon namo ni Tyron. Midiretso na lang siyag pakigbulag nako ug gipasagdan ko niyang makiglambigit kang Tyron. Wala siya mohimog lakang pagdaot sa akong dungog.
Si Tyron na lang ang kanunay kong katambayayong sa pagtagay sa lawasnong kalipay. Nakamatikod ko nga mi-improve og diyotay ang performance niya sa kama apan dili gihapon ko kontento niini. Sa gihapon, naghandom ko sa nindot kaayong performance ni Darwin.
Miabot ang bulan sa Disyembre. Wala pa gihapon ko malimot sa gibuhat ni Harold nako. Gusto gyod kong makabalos sa iyang pagpakigbulag nako. Dakong insulto man gud alang nako nga gibulagan ko sa usa ka lalaki. Angay unta nga ako nga usa ka babaye maoy mohagad sa pagpakigbulag niya.
Okey lang para nako nga si Darwin sab nga miuna sa pagpakigbulag nako kaniadto. Pero dili na ko makadawat nga mahitabo kini sa ikaduhang higayon. Ug kay nahitabo man gyod nga gibulagan kog una sa usa ka lalaki sa ikaduhang higayon, gusto kong manimalos.
Ug si Tyron ang napahungawan ko sa akong kalagot kang Harold. Nagsingabot na kadto ang Christmas vacation sa dihang gidaygan ko si Tyron nga gusto ko nang putlon ang among relasyon.
"Unsa may akong sala, Editha, nga imo man kong buwagan?" Nangayo og katin-awan si Tyron kansang panagway masulub-on kaayo.
"Gipul-an na ko sa atong relasyon," giingnan ko siya. "Way lami."
Nagkabulag gyod mi si Tyron. Morag gisakitan gyod tingali siya sa among break-up kay mihilak man siya sa akong atubangan.
Miabot ang among Christmas break. Permanente lang kong naa sa balay. Malipayon gihapon ang pagsaulog ko sa Pasko bisan wala koy uyab. Hinuon, dili hingpit ang maong kalipay kay morag may kahaw-ang man ang akong kinabuhi. Labaw sa tanan, gihidlaw ko sa lawasnong kalipay nga taudtaod nang wala ko matagamtami.
Mikilab lang paglabay ang bulan sa Disyembre. Enero na sa Bag-ong Tuig. Back to school na. Sa akong pagsulod sa among lawak-saringan, ang unang balita nga mitagbo nako mao ang bahin sa kamatayon ni Tyron. Naghikog kuno kini! (Sumpayan pa)