Taodtaod na nga nagpuyo si Gabriel didto sa Jedda, Saudi Arabia. Nindot ang trabaho ni Gabriel isip usa ka Accountant. Dako-dako ang suweldo nga iyang madawat matag bulan ug tungod niini, wala gayod siya mahikalimot pagpadala og kuwarta sa iyang mga ginikanan matag bulan didto sa ilang dapit sa Davao.
Ug sa matag adlaw Biyernes, nga mao ang holiday didto sa Jedda, mao ang iyang nahimong kalingawan ang pagpadala og sulat ngadto sa iyang mga higala sa Pilipinas.
Ug panahon sa bakanti nga mga takna ni Gabriel, para kalingawan niya, nakig-pen pal siya sa usa ka babayeng buotan. Usa ka Salod nga taga dakbayan sa Cagayan de Oro.
"Salod, gusto kong makigkita kanimo karong umaabot nga Disyembre sa dili pa ang Pasko," matud ni Gabriel. "Gimingaw na ako kaayo diha sa atong nasud. Abi mo Salod, ang ako lang gayod nga kalingawan mao ang pagbasa sa imong mga sulat kay kun akong ipaagi sa text, dili ako matagbaw nga makigsulti kanimo."
"Gab, paabuton ko ikaw dinhi sa among dapit," pulong ni Salod. "Ang atong pagkita, isipon kong gasa sa adlaw kong natawhan."
Mao ang katam-is sa ilang pagsinulatay. Apan luyo nianang tanan, daw dunay gitago ni Gabriel sa iyang pagkatawo nga kun mahimo, dili niya gustong masayran ni Salod. Diha sa hulagway ni Gabriel nga nadawat ni Salod, ingon sa naglimin og tinagoan kay ang hulagway, mao lang ang half body.
Guwapo si Gabriel kun sud-ongon sa iyang hulagway. Ang mga ginikanan ni Salod, miingon nga kun magkita sila, kun mahimo, gusto dayon nila nga magpakasal si Salod ngadtong Gabriel.
"Ba diha, Tay," pulong ni Salod. "Kun dili makagusto kanako si Gabriel. Haskang ulawa ko, no?"
"A basta. Sa akong tan-aw, buotan si Gabriel," pulong sa amahan ni Salod.
"Uy, uy? Ikaw nga tawhana, kun manulti, mora kag nakaseguro magkagusto-hanay sila si Salod ug Gabriel," pulong sa inahan ni Salod. "Sige! Unya na kita maghisgot ning butanga kun nia na si Gabriel."
Miabot si Gabriel sa panimalay ni Salod ug sukwahi ang gilaoman ni Salod. Sa hulagway, usa ka guwapo nga lalaki si Gabriel apan sa personal, usa diay ka tawong dunay problema sa panglawas.
Usa diay ka kimpang kini si Gabriel butang nga dili madawat ni Salod tungod kay nahadlok siya nga kataw-an siya sa iyang mga kahigalaan.
Tungod niini milakaw si Salod ug aron walay problema, giuli ni Salod ngadto kang Gabriel ang mga butang, sama sa mga alahas, nga gihatag ni Gabriel niadtong nagka-higalaay pa sila sa sulat.
"Nganong wala man ikaw mosulti sa tinuod mong pagka tawo," pulong sa inahan ni Salod. "Abi mo Dong Gabriel, dugay nga nagpaabot kanimo si Salod ug sa iyang pagtuo, basi sa hulagway nga imong gipadala kaniya, dili mao kining imong hitsura."
"Kuan man god, Nang. Nasayod ako nga pidya-an ako ni Salod mao nga wala ko gayod isulti ang tinuod kong pagkatawo," pulong ni Gabriel. "Nagtuo usab ako nga dawaton ako ni Salud pinaagi sa mga butang nga akong gihatag kaniya. Apan, dili diay siya masilaw sa gilak sa bahandi."
"Abi mo, Gabriel," pulong sa amahan ni Salod. "Nangandam na kami alang sa inyong kasal ni Salod. Apan, unsaon man nato niini nga milakaw man si Salod? Kun ako ang masunod, boto ako kanimo. Unsaon man ni Salod kadtong mga lalaki nga guwapo tuod apan walay trabaho. Maayo si Gabriel kay maayo ang trabaho ug segurado nga molambo ang ilang pamilya."
Pipila ka mga adlaw nga nagpabilin si Gabriel sa panimalay nila ni Salod ug dihang wala na gayod magpakita si Salod, nakahukom siya nga molakaw na lang balik didto sa Saudi Arabia. Wala kapugngi ni Gabriel ang paghilak apan unsa man niya nga wala naman si Salod. Busa wala siya’y mahimo gawas sa pagdawat sa kamatuoran nga sila si Salod dili para sa usag-usa. (Kataposan)