Gula 105
Gituman namo ang tanang gipabuhat ni Prof. Feder Vercelli namo. Gipabenditahan namo kang Fr. Dean Ejara ang among balay bisan nablesingan na kini kaniadto human sa pagkatukod niini. Nagpamisa sab mi sulod mismo sa balay.
Sila si Papa Gustavo ug Mama Dortha ingon sa dili makatuo sa nahitabo nako. Tiaw ba nga nagsabak ko sa anak sa usa ka incubus? Alang nako, usa kini ka isolated case. Ug nganong sa kadaghan sa mga babaye sa kalibotan, nganong ako pa man gyuy natumngan niining hitaboa.
Gitiman-an gyud namo ni Dirk ang tanang gisulti ni Prof. Vercelli. Gusto ming mabuntog na ang gahom sa incubus aron matapos na ang nightmare nga nahitabo sa akong kinabuhi nga nakaapekto sa kaminyoon namo ni Dirk.
“Ayaw kamo kaikog pagsangpit nako kun ugaling magkinahanglan kamo sa akong serbisyo sa umaabot nga mga adlaw,” nagkanayon si Prof. Vercelli sa labing ulahi niining pagduaw kanako aron pagsusi sa akong kahimtang.
“Gusto kong naa ka, Professor,” giingnan ko siya, “inigpanganak nako.”
“Andam kong moabag,” matud sa psychic.
Samtang mianam pagbusyad ang akong tiyan, namatikdan ko nga wala na mosugmat ang pagpangatol sa akong sexual organ. Ganado na sab ko sa pagkaon. Inanay kong nabalikan sa kabaskog sa lawas. Hangtod nga nahibalik ang kanhi kong panglawas.
Bisan lagsik na ang akong lawas, wala na lang ko mobalik og duty sa hospital nga akong gialagaran. Gisumpayan ko na lang ang gi-file kong sick leave sa akong maternity leave. Nakugang ang akong mga colleague pagkakita nila nga mabdos ko, labina si Cynthia nga gisultihan sa higala niyang uro-genito specialist nga baog ang akong bana. No comment lang ko sa ilang mga pamahayag.
Usa ka higayon niana, nakaplagan ko si Dirk nga nagbasa sulod sa among library. Pagkamatikod niya sa akong pagsulod, iya kong gipaduol sa iyang nahimutangan. May gipabasa siya nako nga nakapatingkag sa akong dalunggan. Bahin sa incubus! -- Sumpayan pa