Pagkagahi god nimo og ulo Masyong, makapila ko na ikaw sultihi nga bisan gamay na lang nga pinitik sa akong kasingkasing, wa gayo’y gamay nga mobati ako kanimo aron ikaw akong higugmaon?" misinggaak ang tingog ni Noring, nga milagbas sa tumang kalanog ning kinatibuk-an namong silingan ning among balangay sa Balungag nga sakop ning among lungsod sa San Fernando.
"Sa unsang katarongan Noring, nga dili man gayod ikaw mobati og paghigugma kanako?" luhaan ang duha ko ka mata nga nagpakisayod sa maong babaye nga giisip kong Manulundo sa akong pagpakabuhi dinhi sa kalibotan.
"Panamin ra god Masyong, aron nimo makita ang imong hitsura kun angay ka ba gayod nako nga higugmaon?" hapit na lang ako itukmod ni Noring aron ako mahiduol sa nahimutangan sa samin nga nagbitay sa ilang bungbong.
Wa na lang ako moduol pa sa nahimutangan sa may samin, kay nasayod ako unsa kalaksot ang akong hitsura. Ambot ba sad ni anhing Tatay Goyong ug kang anhing Nanay Eser, nga naingon man niini ang akong dagway nga ayran sa mga babaye?
Nanaug ako sa panimalay ni Noring nga naghambin sa tumang kahiubos sa akong kaugalingon. Dili tiaw ang akong kahibulong kun ngano si Portik, nga usa ka bungi mao may gisugot ni Noring? Sa akong hunahuna ... labaw pa si Noring kadangog sa isdang halwan kay bisan gani sa pagkupot sa iyang kamot, iya man dayon ako nga dispatsahon diin siya magkanayon:
"Pagkahilas god nimo Masyong nga mokupot sa akong kamot nga kasukaon man gani ako, nga magtan-aw sa imong hitsura nga labaw pa kangil-ad sa unggoy sa lasang?"
Misamot ang kasakit sa akong gibati ... diin maoy akong nabalitaan nga gitaban si Noring ni Portik? Didto pa nako hisayri nga nabaligya diay ang lona sa yuta ni Portik, aron lang paundayonan ang kagustohan nga kapritso ni Noring.
Miabot ang adlaw nga wa ko palandonga. Nanuktok sa among balay si Noring nga nagbakho. Maoy nasugat sa duha ko ka mata nga migakos kanako og hugot nga nagkanayon:
"Ang amigo mong bungi nga si Portik ... Masyong, igo lang ako nga gipahimuslan aron saplion ang kadingding sa akong pagkababaye!"
Sa sinugdanan wa ako makatingog. Gipasigpatan ko si Noring nga hilabihan na kadako sa tiyan kay umaanak. Dili gayod tiaw ang akong kahibulong kun ngano nga mas ngil-ad pa kanako si Portik, kay usa man ka bungi... mao man hinuon ang nakadama sa gugma ni Noring?
Takulahaw may gihagawhaw si Noring nga nagkanayon:
"Tungod sa salapi ni Portik ... nadala ako sa diskarte diin sa akong pagkadangog pa sa halwan ... ako nasikop sa dakong kasayon!" (Kataposan)