Gihagit ni Makoy ang apo sa ungo

Tungod kay nalupig si Makoy ni Samson sa ilang pagpangulitawo kang Mercedes nga anak sa bag-ong napili nga Kapitan sa ilang barangay, gusto niyang patyon
ang naulahi.

Dili siya moangkon sa iyang kapakyasan kay naibog gyud siya pag-ayo ni Mercedes. Dugay na siyang nangandoy nga mamahimo niyang uyab si Mercedes ug kon mahimo pa pakaslan dayon niya kini.

Apan pakyas siya kay si Samson man ang palaran sa ilang panagribal. Patyon ko ikaw, Samson! Aron wala nay makababag sa akong tinguha kang Mercedes! Mao kini ang didto sa suok sa iyang galamhan nga karon nahimugso na gyud nga usa ka laraw.

“Bay Makoy, lupig man lagi kang Samson,” nagkanayon si Tokles ang amigo niyang bugalbugalon ug suod usab niyang higala sukad pa kaniadto.

“Di ko modawat og kapakyasan, Bay Tokles, uy. Sayod ka na man gyud ba nako, di ba?” ni Makoy pa nga nagpangagot ang ngipon.

“Unsay imong buhaton, Bay?” Nangutana ang higala.

“Aw, mahibaw-an ra na nimo,” mubong tubag ni Makoy.

“Kun makigsumbagay kang Samson, lupig ka, Bay, kay black belter man nang tawhana,” asoy ni Tokles.

“Dili ko moilag black belter, Bay. Ugma, mahibaw-an na unya nimo ang mahitabo kang Samson,” namuwa ang mga mata ni Makoy sa kalagot. Nagsalig man god siya kay dato ang iyang mga ginikanan.

Karon, kay gabii na, iyang atngan si Samson sa may eskina sa lawom nga imbornal. Nagdala siya’g pistola ug pinuti. Apan gusto niya nga hagiton niya’g buno o tinigbasay si Samson. Wala lang sila mahibawo si Bay Tokles niya nga dugay na siyang nagtuon og doce pares ug maayo usab siya sa eskrima. Maoy iyang tuyo nga iya gyung patyon karon si Samson aron wala nay makapanag-iya kang Mercedes kondili siya lang. Taudtaod diha na si Samson. Nagtutaghoy pa kini nga naglakaw ug sa paghiduol niini tungod kaniya, iya dayon kining gisugat ug gihagit.

“Kita ra mang duha ron dinhi sa may imbornal, pinatyanay ta,” gihanggat dayon niya si Samson.

“O, unsa man, siga man nang mga mata nimo, talaw ka nako?”

Igoigo gyud nga nakahumag sulti si Makoy kalit lang nga nausab ang bayhon ug hitsura ni Samson ug wala dangtig dugay nahimo kining usa ka dakong iro nga itom ug miatubang kini kang Makoy ug nagngulob na.

“Ngggggrrrrrrrrr!!! mingulob pag-usab ang dakong iro. Unya, gidasmagan si Makoy ug gibugno ug labihang daghana’g samad si Makoy ug kay wala man siya’y mahimo, misutoy siya’g dagan ug maayo lang gani kay wala siya gukda sa iro nga mao si Samson.

Nagpa-hospital si Makoy sa mga samad nga mga pinaakan sa iro nga itom. Dihang gisugid niya kang Tokles ang bahin kang Samson nga nahimong usa ka dakong iro nga itom, naniga ang mga mata ni Tokles.

“Bay, Bay Makoy, wa man diay tika kasultihi, no, nga kana si Samson apo ni Hugo Ungo, ang labing mangtas nga ungo dinhi sa ato kaniadto, kay mao nay sulti sa akong lolo Tasyo...” ug nahilom si Tokles. Dinhi gibati og hilabihang kahadlok si Makoy. -- Kataposan