Labihang lagota ni Vassy. Nasakpan gayod niya sa akto si Edward nga nakig-date kang Rochelle. Naghinungitay pa ang duha samtang nangaon sa Jollibee. Malipayon kaayo sila. Wala lang silay kalibotan nga nakasaksi siya sa ilang gibuhat. Ug karon nga nahitungha si Edward sa iyang gipuy-an, panahon na aron iya kining sudyaan.
"Milagro nga napadpad ka dinhi karon, Edward," nagkanayon si Vassy. "Abi ko bag gitingob na nimo ang imong panahon alang kang Rochelle?"
"U-unsa god kanang gipanulti mo, Vas?" ni Edward nga nagpatusotuso.
"Ayaw na lang pagpakaaron-ingnon, Edward," ni Vassy. "Nakita ko kamo kagahapon nga malipayong nangaon sa Jollibee. Ug dili ko utok og bolinaw nga dili makasabot sa kahulogan sa akong nakita."
Kalit nga nanglipaghong si Edward sa atubangan ni Vassy. Nasabot sa dalaga nga nakalitan kini ug wala masayod kung unsay itubag.
Makadaghan na magluib si Edward sa ilang relasyon ni Vassy. Ang una mao kadtong pagpakiglambigit sa lalaki sa iyang ig-agaw nga si Ara. Gisundan kadto ni Lizanne, usa ka dancer sa club. Diha pay ginganlan og Ina nga gikarelasyon usab ni Edward. Ug karon si Rochelle na usab ang iyang kauban sa trabaho.
Kanunay masakpan ni Vassy ang mga tinonto ni Edward. Makadaghan na siya magtakda sa pagpakigbulag niini. Apan dili mahinayon ang iyang tinguha pagputol sa ilang relasyon. Mobati siyag kaluoy kang Edward sa higayon nga mangayo na kinig pasaylo kaniya. Malukmay dayon ang iyang kasuko. Ug mapapas nalang sa iyang hunahuna ang pagluib ni Edward sa ilang panaghigugmaay.
"Pasayloa ko, Vas," ni Edward nga mao pa makatingog tapos sa taudtaod nga pagkaulipon sa kahilom. Tinuod nga may relasyon kami si Rochelle. Apan nagkabulag na kami. Busa pasayloa ko."
"Pasaylo?" ni Vassy pa. "Gipasaylo ko na ikaw sa makadaghan apan imo akong giabusohan."
"Isaad ko nga dili na ko mousab, Vas," ni Edward. "Please hatagi kog laing higayon. Ikaw ang akong gihigugma. Dili makatugot nga mawala ka kanako."
Sa laing higayon, gipasaylo na usab ni Vassy si Edward. Apan wala madugay nasakpan na usab niya kini nga may gikabuangang laing babaye.
"Traydor ka gyod, Edward!" milugan-ob kining mga pulonga sa kahiladman ni Vassy. "Wa kay baroganan."
"P-pasayloa ko, Vas," ni Edward nga nagduko gihapon. "Dili na ko mousab."
"Tinuod nga dili ka na gayod makausab ... tungod kay karong gabhiona taposon ko na ang tanan tali kanato. Magbuwag nata."
"Vas, mahimo ba nga dili ka magdalidali sa imong hukom?"
"Wala na akoy pasaylo nga ikahatag kanimo, Edward. Gihigugma ko ikaw apan imo kining giabusohan. Busa sakit man alang kanako apan kinahanglan matapos na ang tanan tali kanato."
Ug gitalikdan na ni Vassy si Edward. (Kataposan)