Sanglit sapian man ang pamilya ni Ranil, misukol sila sa pagpakigburoka sa influential nga pamilya ni Delton. Ingon sa wala mahadlok ang pamilya ni Ranil sa kamatuoran nga anak sa bise mayor sa inyong lungsod si Delton.
Sa imong bahin, Jamaica, nagpasalamat ka nga wala ka malambigit sa kaso. Gipasagdan mo lang ang duha ka pamilya nga nagbangi. Nahimuot hinuon ka sa hilom. Nasayod ka nga ikaw maoy hinungdan sa panagbangi sa pamilya nila ni Ranil ug Delton. Nasayod ka nga ikaw ang lintunganay'ng ugat sa maong kagubot.
Apan alang nimo, kulang pa ang nahitabo, Jamaica. Wala ka pa matagbaw sa pagpasakit sa mga lalaki. Makabaton ka lang tingalig katagbawan sa imong gibuhat kun si Maynard na mismo ang imong mapasakitan sanglit siya man ang hinungdan nga naingon ka niini ngadto sa mga lalaki. Ang pagluib ni Maynard sa inyong gugma maoy hinungdan nga gusto mong pasakitan ang mga lalaki nga malambigit sa imong kinabuhi.
Samtang padayon pang gibista ang kaso nga gipasaka sa pamilya ni Delton batok kang Ranil ug sa mga higala niini, nagpadayon sab ang maayong relasyon ninyo ni Delton. Dihay kausa nga gidala ka ni Delton ngadto sa ilang balay ug gipaila ka sa ulitawo ngadto sa iyang mga ginikanan. Maayo silang mitagad kanimo. Apan ikaw nakigplastikay lang kanila. Wala ka mangandoy nga mahimo silang imong mga ugangan. Kay karon pa lang gani, nangita ka nag paagi nga makadistansiya ka kang Delton.
Oo, sama sa pagpakigrelasyon mo kang Ranil kaniadto, wala ka magplano nga seryosohon ang pagpakig-relasyon kang Delton. Mao nga mo-exit ka na karon nga hapit na matapos ang iyang papel sa imong kinabuhi. Nagplano kana sa pagpakigbulag kaniya.
May mga higayon nga balibaran mo si Delton kun mohagad siya nimo sa pagpanuroy. Bisan unsa lang ang himuon mong alibi. Apan ang tinuod, dili kana gustong makigkuyog niya. Dili ka na ma-enjoy sa inyong panag-uban. Ug kun makakita ka nag tukmang higayon, mopadayag ka na kaniya sa pagputol sa inyong relasyon.
Usa niana ka adlaw, nakadawat mog daotang balita. Ang imong manghod nga si Jessa gipatay. Napalgan na lang kining wala nay kinabuhi sulod sa lawak sa usa ka hotel. (Sumpayan pa)