Daghan nang gabii nga naghilak si Linda sa sulod sa iyang lawak ning lodging house nga iyang giistaran sa siyudad. Tungod sa gihambin niyang problema, naapektohan ang iyang pagtuon sa unibersidad nga iyang gitunghaan. Mius-os ang tanang grado sa iyang mga subjects sa kursong Computer Engineering nga iyang gi-eskuylahan karon.
Moggradwar na siya sa maong kurso ning tuiga. Ug ning gabhiona, wa na sab kapugngi ni Linda ang pagpatulo sa iyang mga luha. Biktima siya sa naghingapin niyang gugma sa guwapo niyang propesor sa unibersidad - kang Sir Rey Aligato! Gani, gikatugyan na niya sa iyang guwapong propesor ang iyang pagkababaye, sulod sa tulo na ka higayon sa usa ka motel nga gitsik-in siya niini. Nabugha na gayud ang iyang kaputli. Nawangwang na ang iyang pagka-birhen!
I"m sorry, Linda! Apan hibaw-i nga minyo na ko! Di ko makatuman sa imong kagustohan...!" kini ang pintok nga gipamulong sa guwapo niyang propesor, dihang gipahunat kini ni Linda kun andam ba kining manubag ug magpakasal kaniya kun magbunga ang ilang gibuhat sa sulod sa motel.
"Apan, Sir! Mag-unsa na lang ko? Simbako kun magsabak ako....?"
"Akoy bahala sa tanan, Linda! Basta ang importante nga isekreto nato kining atong relasyon aron dili maapektohan ang akong pagkamaestro! Okay man lang kaha ka sa kabitkabit nga relasyon...?"
Mao kini karon ang problema ni Linda. Dili siya makatugot nga duladulaan lang ni Sir Rey ang iyang pagkababaye. Wala na siyay nawong nga ikaatubang sa iyang kahigalaan sa unibersidad kun masayran nga nabugha na sa guwapong propesor ang iyang pagkababaye. Nakasala siya sa iyang mga ginikanan sa Leyte. Nahisukamod siya sa naghingapin nga gugma sa minyo na diay nga propesor. Gibalewala niya ang kanunay nga ipahimangno sa iyang mga ginikanan kaniya sa pagtinarong gayud sa pag-eskuyla sa kolehiyo sa siyudad.
Kadaghan sa ulitawo nga nanguyab kaniya sa unibersidad nga iyang gipakyas. Apan nganong sa minyong propesor siya nahinayak sa makabuang nga gugma.
May mituktok sa pultahan. Kay wala niya ma-locked ang seradora sa pultahan sa lawak, maoy nabantang sa panan-aw ni Linda ang pamayhon ni Henry nga misulod. Nagpahiyom kini kaniya. Si Henry mao ang suod niyang higala sa ilang dapit sa Leyte. Managsama sila nga nagkuha sa kursong Computer Engineering ug mogradwar na sab ning tuiga. Nag-istar usab si Henry sa samang lodging house. Hilabihan ang ilang kasuod. Ug magsumbongay sila sa ilang mga problema.
"O, nganong nanghubag man ang mga mata mo, Lin? Naghilak na sab ka? Problema gihapon sa kasingkasing....?" nagpahiyom si Henry nga mitupad sa paglingkod kang Linda sa sopa sa sulod sa lawak.
"Minyo man diay si Sir Rey, Hen! Giilad ko niya....!"
"Da, daan pa lagi ko! Sus, parehas gayud ang atong problema! Gibuwagan ko usab ang syota kong si Rose kay nasakpan nakong nanan-aw og sine uban sa klasmit natong si Jimmy! Uyab sab diay sila ni Jimmy!”
Nahagakos si Linda kang Henry. Mibakho. Gihapuhap usab sa ulitawo ang bukobuko sa dalaga.
"Ayaw na'g hilak, Lin! Dawaton nato ang tanan! Kun mosugot ka, ablihan nato ang atong tagsatagsa ka mga kasingkasing alang natong duha! Total suod man gyud ta! Nasayod na ta sa atong taras ug kinaiya...!"
Nahatutok si Linda kang Henry nga naggakos gihapon sa ulitawo.
"U-unsay buot mong ipasabot, Hen....?"
"Andam kong moamuma sa imong gugma, bahala na'g may nahitabo na ninyo ni Rey Aligato! Dugay naman sab ba nga may pagtan-aw ko nimo!" puno sa pagmahal nga padayong gihapuhap ni Henry ang abaga ni Linda.
"H-Henry...!" hugot na gayud nga migakos si Linda sa suod nga ulitawo. Mibalos sab sa paggakos si Henry. Sa kaapingan ni Linda, nanailos na usab ang iyang mga luha. Oo, luha sa hilom nga kalipay kay sa kinahiladmang suok sa iyang kasingkasing niadtong orasa, gidawat na niya ang tanyag sa ulitawo. (Kataposan)