Sulod sa ilang opisina mao ray giistoryahan sa mga empleyado ang bahin kang Eduardo nga ilang general manager nga naibog kang Maricar nga usa ka accounting clerk dinhi sa ilang kompaniya.
Ila kining namatikdan dihang kanunay na nilang makita si Eduardo nga magduolduol kang Maricar. Usahay, imbitahon sa ilang boss si Maricar nga mangaon sila sa gawas. Usa sa mga kaubang empleyada ni Maricar nga si Erwina gibatig kalagot sa hilom kay naibog man siya ni Eduardo. Guwapo kini si Eduardo ug may pamarog nga kaibgan gyud sa mga babaye.
“Suwerteha nimo, no, Maricar, kun dayonon kang, Sir,” ni Erwina pa nga morag nagdalag kantalita. “Pero, may nadunggan kong tabitabi nga playboy man kuno kana si sir Eduardo...”
Nakasabot si Maricar nga morag nagselos si Erwina sa kanunay’ng pagduolduol ni Eduardo kaniya busa wala na lang niya kini tubayi. Milakaw na lang siya ug mibalik sa iyang lamesa kay duna pa siya’y daghang i-record nga mga accounts sa ledger.
“Maricar, laina anang Erwina, no, masabot kaayo nga morag nasuya siya sa pagpakigsuod ni Sir Eduardo nimo,” nagkanayon si Ana nga suod nga higala ni Maricar. “Klaro kaayong naibog na siyang sir, uy.”
“Da, pasagdi lang god na siya, magsakit lang ang iyang dughan,” hinay nga tubag ni Maricar.
Usa ka gabii nangitag paagi si Erwina nga iyang matental ang ilang boss nga si Eduardo. Iya kining giduol dihang mosulod na kini sa iyang kotse aron mopauli na.
“Sir Eduard, puwede maka-hitch?” paraygong tingog ni Erwina. “Anha lang ko mo-drop sa may South Bus Terminal...”
“Sure, why not. Okey, sakay na ngari, Erwina,” ni Eduardo pa nga miagda kang Erwina. Unya sa nagdagan na ang kotse si Eduardo ang mibuak sa kahilom,” Imbitahon tika, Er, okey ka?”
“Asa man ko nimo dad-a, Sir?” miiknat ang kilay ni Erwina nga sa hilom nalipay sa pag-agda kaniya ni Eduardo.
“Basta kuyogi lang ko,” seryosong tingog ni Eduardo.
Wala makatingog si Erwina dihang gipasulod ni Eduardo ang iyang kotse sa gate sa usa ka motel. Ug didto sa lawak sa usa ka motel nagpasumbingay dayon si Eduardo.
“Nganong imo man kong gidala dinhi, Sir?” nagpakisayod kunohay si Erwina pero sa tinuod lang mao niy iyang gusto.
“Erwina, nakagusto ka nako, di ba?” pahiyom ni Eduardo. “Gidala ko ikaw dinhi aron maglipay tang duha. Sige, paghubo na kay moadto pa kog kadiyot sa CR,” ug mipaingon si Eduardo sa CR. Dugay nga nahibalik si Eduardo. Nagpaabot na si Erwina nga wala nay sapot.
Taudtaod may migawas gikan sa CR apan nakurat si Erwina kay dili man si Eduardo ang migawas kondili usa ka dakong iro nga puti nga nagkorbata, ug nakaila siya sa korbata labi na ang kolor niini. Korbata ni sir Eduardo niya pa sa hilom nga nakuyawan. Unya, miduol ug mingulob ang irong puti kang Erwina ug gibugno ang dalaga.
Didto sa ilang opisina ni Maricar nakahilak siya sa balita bahin sa kamatayon ni Erwina nga nakuniskunis ang lawas niini sulod sa usa ka motel. Taudtaod, miduol si Eduardo kaniya ug nangimbitar nga mangaon sila sa gawas apan mibalibad siya kay siya mismo nakakita nga si Erwina ang sakay sa iyang kotse kagabii. (Kataposan)