May nadungog na si Peryong nga mga awit sa Pasko nga gising-al diha sa mga radyo sa kasilinganan. Hasta gani sa ilang esteryo gipatugtog na sa iyang mga anak ang mga awitonon sa Pasko sa napalit nilang mga CD didto sa siyudad.
Ug alang kang Peryong kun ingon na gani niini nga panahon dili gyud niya tuyuon nga malipay siya ugaling lang dunay masakiton nga nia karon nagbatang sa ilang balay ug kini mao ang iyang inahan.
Iya na kining gidala sa hospital apan gitambagan siya sa doktor nga adto na lang sa balay papahuwayon ang iyang inahan pinaagi sa pagpainom niinig mga tambal nga maoy gi-resita kaniya sa doktor.
Nakasabot si Peryong nga dili na magdugay kining iyang inahan. Hinuon, may kalipay gihapon nga mihapuhap og gamay sa iyang dughan kay mabdos man sa kinamanghoran nilang anak ang iyang asawa nga si Lina.
“Lagmit matunong gyud sa adlaw sa Pasko ang akong pagpanganak, Peryong,” ni Lina pa. “Medyo sakitsakit na man ang akong tiyan...”
“Aw, kun mahitabo na, Lin, atong nganlag Hesus kanang bataa pananglit kun matunong gyud sa petsa 25 niining buwan sa Disyembre,” ni Peryong pa usab nga medyo wala makasabot sa iyang gibati.
Pagka ingon ugma sa gabii, nakugang si Peryong kay may nabati man siyang tingog sa wakwak didto sa may atop sa ilang balay ug dugay kining nagtingog. Mibangon si Peryong ug gikuha ang iyang pinuti. Tungod sa kasikas nga iyang nahimo, nahigmata pod si Lina.
“Unsa ron, Ryong?” gialimungawan si Lina nga nangutana.
“Wakwak, Lin,” mubo niining tubag. “Dinhi ka lang kay akong kanaugon.”
Sa pagkanaog ni Peryong maoy iyang nakita ang wakwak nga nagkumpayot sa may bentana sa masakiton niyang inahan. Gisinggitan niya kini ug dayon giduol aron tigbason apan dali kining nakalupad pahilayo sa may bentana.
Ug ingon sa may nasiklapan siya sa nawong sa wakwak kay milingi man kini kaniya sa wala pa mopahilayo, iyang nakita nga nawong gyud ni Tasyo, ang bag-o nilang silingan nga nagbalay diha sa may unahan og gamay.
Nianang pagka ingon ugma sa gabii, napugwat si Peryong sa awit sa mga mananaygon. Midali siyag panambo ug sa dako niyang kahikurat maoy iyang nakita ang pamilya ni Tasyo nga maoy nanaygon. Diha pod si Tasyo ug ang iyang asawa kuyog sa lima niya ka mga anak ug si Tasyo ang miduyog sa sista.
Karon, nakabantay na si Peryong nga lain og tumong kining maong pamilya. Naniid kini sila ug nagpasumangil lang og panaygon kay buntis ra ba ang iyang asawa ug masakiton usab ang iyang inahan.
Sa pagka sunod nga gabii, gipanid-an ni Peryong ang balay nila ni Tasyo ug mao ni iyang nadungog samtang sila nanagsultianay.
“Banang, lamia gyud sa asawa ni Peryong, uy, kay mabdos humot kaayo. Hasta pod ang masakiton niining inahan, humot pod,” ni Tasyo pa ngadto sa asawa.
“Oo, ug lami na kaayong kan-on,” tubag asawa.
Dinhi mipauli dayon si Peryong aron pagkuha sa iyang ripli aron pamusilon niya kining maong pamilya nga ungo. (Kataposan)