(Gula 1)
(PASIUNA: Kining maong nobela gibase sa matuod nga kasaysayan sa kinabuhi sa usa ka babaye. Giusab lang namo ang ngalan, bansagon ug dapit nga nahitaboan aron pagtabon sa dungog sa mga hingtungdan. -- Tagsulat)
Nangaon kami si Alvin sulod sa usa ka fastfood outlet sa P. del Rosario sa dihang misukna siya mahitungod sa gugmang iyang gihalad kanako.
“May paglaom na ba ko, Jomelle?” Nagkanayon si Alvin.
“Gikasubo ko, Alvin,” giingnan ko siya. Buotan ka. Apan kutob lang sa pagpakighigala ang gusto ko tali kanatong duha. Gawas niana, wala na koy laing mahimo.”
“Lisod ba diay kong higugmaon?”
“Dili baya. Pero dili ko katudloan ang akong kasingkasing, Alvin. Unfair man sab sa imong dapit kun makigrelasyon ko nimo bisan wala tikaw higugmaa.”
“Nakasabot ko sa imong bahin, Jomelle. Sagdi lang. Andam kong magpaabot bisan kanus-a. Paaboton ko ang higayon nga mahigugma ka na kanako.”
“Basin mabawo ka lang unya.”
“Bahala nag magpaabot ko sa wala. Basta kay ikaw ra gyud ang akong higugmaon.”
Human sa among panagsulti, nanamilit na si Alvin kanako. Miuna siya’g gawas sa kan-anan nga among gisudlan. Wala siya motiwas og kaon. Nag-inusara na lang kong nagkaon kay gibiyaan man ko ni Alvin nga ingon sa nangluod.
Dugay nang nangulitawo si Alvin nako apan wala ko siya sugta. Unsaon nga wala man gyud ko mahigugma niya. Usa ka seaman si Alvin. Ang iyang ig-agaw nga si Annabelle kinsa suod ko usab nga higala nagsigeg apura nako nga sugton ko na siya. Pero nagdumili ko kay wala gyud koy pagbati bisan gamay na lang alang kang Alvin.
“Hi...”
Naigking ko pagkadungog sa sangpit sa usa ka lalaki nga nagbarog sa atubangan sa lamesa nga akong gikan-an. Nagsapwang siyag tray nga gipatungan sa mga pagkaon.
“Mahimo bang mag-share tag lamesa?” Nagkanayon ang lalaki nga sa una kong impresyon, siya guwapo ug may sex appeal. – Sumpayan pa