Hapit na lang ilabay ni Miyoy, ang iyang sugong dapit sa may palwa sa iyang gisanggotan. Dili tiaw ang iyang kahisagmuyo nga ang kamahal karon sa tungog nga iyang pinalit kagahapon atol sa tabo ning ilang lungsod sa San Fernando, moresulta ba diay sa pagkutod.
"Ingon gayod niana ang panahon, Miyoy!" dihay gihagawhaw kaniya ni Nisya nga taudtaod nang naghuwat aron silang duha mamahaw sa init kaayo nga tinughong.
"Tan-awa sa miaging semana ... mangabahal na lang gani gumikan sa naghinubra nimong buntagong dawat!"
Wa na lang tubayi pa ni Miyoy ang gipamulong sa iyang asawa. Kinsa ba tuod ang dili mangandoy nga bana nga sa kabag-ohay pa lang nilang nanagtipon, isip magtiayon ... may bulawanong damgo si Miyoy, nga makatukod og arang-arang nga balay? Dili sama sa ilang gipuy-an ni Nisya nga nahisama lamang sa usa ka tinakumba nga payag.
"Suwerte kaayo kitang duha Nisya ... nga kining gamay’ng luna sa yuta nga gipanag-iya sa nanga-anhing kong ginikanan ... gipanamnan nila og lubi nga karon maoy akong gipahimuslan sa pagpananggot!" misamot kalihang ang bag-ang ni Miyoy nga namulong sa iyang asawa.
Bugtong nga anak si Miyoy sa magtiayong Bador-Iska ning ilang balangay sa Balungag, nga sakop ning lungsod sa San Fernando, nga gumikan sa nasunod ni Miyoy gikan ni anhing Tatay niya Bador nga usa usab ka manananggot.
"Wa kahay mananangko nga nagpasipala og panangko nianang imong sanggotan ... Miyoy?" kausa gihagawhawan siya ni Nisya samtang nagtupad silang duha sa pagpanghigda sa ilang dakong lantay sulod sa ilang sibay.
"Duha na god ka buwan ... kanunay na lang nga mabasiyo ang imong sugong sa tuba?"
Nagpabilin nga way tingog si Miyoy. Usahay makaingon siya sa iyang kaugalingon ... basin tuod insakto ang gipanagna sa iyang asawa? Apan kinsa man usab ang angay niyang kapasanginlan nga wa man siya makasakop sa akto?
"Nisya ... dili ka masuko kun sulayan ko na usab ang imong sanggotan kun wa ba usab mokutod? Basin baya gihilom kana sa pagtangko?" dihay kapagaw sa tingog ni Miyoy ngadto sa iyang asawa.
"Sulayi lang Miyoy ... kun manuba pa ba kay taudtaod na ra ba nga wa mapitlagongi ... gumikan kay ang imong giuna mao man ang imong sanggotan!" may tuno sa pagmahay ang tinubagan ni Nisya.
Takulahaw ... ang nagbuy-od nga kahilom ang mibanos, diin mao na lamang ang mabatian ang inudhak ni Nisya nga giayo og pitlagong ni Miyoy. – Kataposan