(Gula 52)
Nangaplay dayon kog trabaho. Gitabangan ko ni Ate Zsa Zsa mao nga dali ra kong nadawat. Sa usa ka inilang hospital sa Manila ako nakatrabaho. Kontento ko sa akong suweldo ug komportable ko sa akong pag-alagad sa maong tambalanan. Miabag ko ni Ate Zsa Zsa sa mga galastohan sa balay ilabi na sa abangan niini ug sa balayranan sa tubig ug kuryente aron dili ako mahimong gubin sa akong maguwang.
Sa hospital, adunay usa ka doktor nga nakigsuod nako. Tawgon ko lang siya sa ngalan nga Dr. Suave. Dili mahimong ibutyag ko ang iyang ngalan ug apelyido. Dili komon ang iyang bansagon busa peligro nga ma-trace kini sa maukitong mga tawo.
Sa akong nasayran, minyo na si Dr. Suave. Siya mismo ang mitug-an nako niini. Komedyante si Dr. Suave. Kanunay ko niyang komedyahan. Kanang komedya nga kun akong patolan, posibleng iyang tinud-on. Kanunay ko niyang pabation og mga pasumbingay nga ingon sa nakagusto siya nako. Pareho ming bisaya busa dali ra ming magkasinabot.
To be honest, type unta nako si Dr. Suave. Kun kalitan siyag tan-aw, susama siyag pamayhon ni Leonardo de Caprio. Guwapo siya ug humot. Nagbaton og kusog nga sex appeal. Ugaling lang kay dili na siya available kay may asawa na man lagi siya. Mao nga bisan og type nako siya, wala ko mopatol sa iyang mga pasumbingay. Human sa nightmare nga nahitabo kanako samtang nag-eskuyla pa ko didto sa Sugbu, gusto kong going straight na gayod ang akong kinabuhi. Dili na ko gustong madakin-as pag-usab ning madanglog nga kalibotan. Mao nga wala gyud ko magpatental ni Dr. Suave.
Apan ang kalig-on batok sa tentasyon dili gayod kapanansagan. Inanay kong nadutlan kang Dr. Suave. Hangtod nga ingon sa nawad-an ko sa hustong panimbang sa kaugalingon ug nagpadala ako sa hulhog sa yawa. It was a boring day para namong mga nurse one afternoon tungod kay dili mi busy sa mga buluhaton sa tambalanan. Dihay miabot nga mga pasyente pero minor cases lang mao nga walay challenge that day. Samtang naghinuktok ko, nakita ko si Mr. Suave nga nagpaingon kanako.
Miduol gayod siya nako kay may mahinungdanon siyang tuyo. Nagsusi siya sa records sa usa ka bata nga pasyente. Gikulbaan ko sa dihang nagkaatubang na gyud kami. -- Sumpayan pa