Gula 73
Miduko ko kay dili ko makaharong sa tinan-awan ni Padre Dick kanako. Nagpadayon siya sa pagpasopaso sa akong atubangan.
“Gipatawag ko ikaw, Eva,” sa pari pa, “tungod kay sa kapin duha ka tuig na nakong pagkadestino isip kura paruko dinhi sa Mabini, karon pa man ko makakita nimo nga misimba. Gikalipay ko ang imong gibuhat.”
Wala ko motingog.
“Gusto ka bang mahimong membro sa choir sa simbahan?” Sukit sa pari.
“Dili man ko nindot og tingog, Padre,” matud ko.
“Diay ba? Buyno, sige na lang. Kun dili ka gustong mag-choir, basin gusto kang mahimong sakop sa Parish Youth Ministry sa atong parokya.”
“Hunahunaon ko pa kana, Padre.”
“Ikaw ang mag-igo.”
Nahilom ming duha. Nagpasopaso gihapon ang pari sa akong atubangan.
“Mamords man diay ka kaayo, Day,” nagkanayon ang pari nga mitutok nako.
Miduko ko sa iyang atubangan. Nakasabot ko sa kahulogan sa iyang gisulti. Ang buot niyang ipasabot mao nga nindot kog lawas. Mamords!
“May uyab ka na ba?” Laing pangutana sa pari.
“O-oo, mitubag lang gihapon ko bisan gilainan ko sa iyang pangutana.
“Pagka suwerte sa lalaki nga imong nauyab,” matud ni Padre Dick nga ang tuong kamot gipatong sa akong abaga. “Naka-kiss na ba siya nimo?”
Lingolingo ray akong gitubag kay wala ko layhing mamulong. Gibakakan ko ang pari. Bahala nag makasala, dili ko motug-an nga nahagkan ug dili na ko virgin.
“Di kaha masuko ang imong boyfriend kun makig-date ko nimo?” sa pari pa. -- Sumpayan pa