(Gula 71)
Gikuha ni Rodney ang akong short ug underwear nga iyang gisagbay sa sanga sa dakong punoan sa pagatpat nga nahimutang dili kaayo layo sa bunbon. Paghibalik niya sa akong nahimutangan, nag-ilis dayon ko.
“Mamalik na ta ngadto sa beach,” matud ko human makailis. “Tingalig mahibulong ang atong mga kauban nga kalit lang tang nangawala.”
“Okey, mobalik na ta,” ni Rodney pa nga nagtingsi. “Dili na ta alkanse. Nakascore man gyud tag tulo ka round.”
“Kuwanggol,” matud ko dungan ang pagkusnit sa iyang kilid.
Unya nanggawas kami gikan sa katunggan. Miubog kami sa dagat nga taga dughan ang giladmon ug mitipon sa among mga kauban nga nangaligo pa sa dagat. Mora lang og walay nahitabo tali namong duha ni Rodney.
Nianang pagka Martes, mitungha ang akong regla. Nakapasalamat ko sa hilom kay wala gihapon ko momabdos. Tuloy ang ligaya namo ni Rodney.
“Mosulod ko sa imong kuwarto rong gabii,” ni Rodney pa usa niana ka udto nga nag-abot me sa canteen sa eskuylahan.
“Dili mahimo,” matud ko. “Mitungha ang binuwan kong bisita.”
“Ay, anugon,” nakapanglitik siya sa iyang tudlo. “Pero...okey lang.”
Miabot ang laing adlaw’ng Domingo. Human sa pamahaw, nag-ilis ko aron mosimba. Nagdali-dali ko aron makaabot sa second mass. Igo lang gyud kong nakaabot sa simbahan, gisugdan sa pari pagsaulog ang santos nga misa.
Pag-abot sa panahon sa pagpangalawat, minunot ko sa linya sa buot mokalawat. Sa akong pagkalawat, gitutokan kog maayo ni Padre Dick. Pagkahuman sa misa, usa sa mga kulitos ang miduol kanako. Makigsulti kuno si Padre Dick nako. – Sumpayan pa