Gula 72
Ingon sa mibatig kahingawa si Althea sa giplanong buhaton ni Rey Corpuz. Migakos kini kaniyag hugot kaayo. Gigakos usab kini ni Rey.
“Pag-amping baya, ha,” ni Althea pa. “Dili ko buot nga may daotang mahitabo nimo. Magpaabot ko sa imong pagbalik.”
“Ayaw kabalaka,” ni Rey pa usab. “Mobalik ko dinhi nga dala na si Cong. Temistocles Geligao. Kinahanglang mataral siya sa hukmanan aron malimpiyo sa hingpit ang ngalan sa VPL nga iyang gibulingbulingan.”
Ug niana dayong adlawa, migikan si Rey sa dakbayan sa Sugbu paingon ngadto sa amihanang bahin sa lalawigan sakay sa kaugalingon niyang awto. Sangkap siya sa gikinahanglan niyang mga armas nga iyang gisulod og bag.
Pag-abot ni Rey sa usa ka lungsod sa amihanang Sugbu nga maoy labing duol sa isla sa Canraza, nangabang si Rey og pumpboat nga maoy iyang sakyan pagtabok ngadto sa maong isla. Mikuyog kaniya ang tag-iya sa pumpboat nga maoy nakatultol sa isla sa Canraza. Paglabay sa tulo ka takna nilang paglawig sa lawod, nahiabot ang pumpboat nga ilang gisakyan sa isla. Kilumkilom na niadtong tungora.
“Dinhi ka lang, Noy,” giingnan ni Rey ang tag-iya sa pumpboat dihang mitakas na siya sa banika. “Paabota lang ko dinhi. Mobalik dayon ta ngadto sa mainland kun mahuman na ang akong tuyo dinhi.”
“Mag-agad lang ko nimo, Sir,” matud sa tag-iya sa pumpboat.
Milihok dayon si Rey. Miadto siya sa kabalayan ug nangutana sa mga nagpuyo kun hain dapit ang kayutaan sa isla nga gipanag-iya ni Cong. Geligao. Nagpasalamat siya kay mikooperar kaniya ang mga molupyo sa maong isla.
Hingpit nang nakatikyop ang kangitngit dihang nahiabot si Rey sa balwarte ni Cong. Geligao sa isla sa Canraza. Gikoral og tunokong alambre ang kayutaan nga gipanag-iya niini. Dunay gamay’ng pantalan nga gidunggoan sa upat ka speedboat. Sa unahan og diyotay, nalantawan ni Rey ang usa ka balay nga luho ang katukoran.Mihinay si Rey sa pagpaduol sa maong balay. -- Sumpayan pa