Naghinayhinay siya og sulod sa ilang sala. Nagkinto-kinto siya nga misubay sa pasilyo padulong sa nahimutangan sa iyang lawak. "Diin ka gikan Janet?!" Milanog sa tibuok suok sa mansiyon ang isog nga tingog sa iyang amahan. Gipasiga niini ang suga. "Dad...nag-research pa man gud ko." Nakulbaan siya.
"Nag-research? Mao ka na ang pirme nimong ikatarungan Janet! Alas dos na sa buntag unya nag-research ka pa niining mga orasa? Ug nganong dili naman ka mag-uniform inig uli nimo diri?" Isog siyang gitutokan niini.
"Dad, kuan man gud."
"I am very disappointed on you Janet!" Gibiyaan siya niini. Nahiugbok siya sa iyang nahimutangan. Wala siya makatingog.
Gipukwat niya ang iyang mga mata. Gisud-ong niya ang orasan sa iyang center table. Pasado alas onse na sa buntag. Katulgon pa siya. Kalit nga miabli ang pultahan sa iyang kuwarto.
"Good morning Ate!" Mapahiyumon nga miduol kaniya si Cathleen. Ang iyang upat na katuig nga manghod. Duha lang silang magsuon.
"Good morning too little sister!" Mibangon siya ug gigakos kini. Gipuno niya og halok ang mga aping niini.
"I love you Ate." Mibalos kini og gakos ug halok kaniya.
"Ate loves you too. Be a good girl always ha. Don't be like me." Miabli og usab ang pultahan. Ug isog nga misulod ang iyang amahan. Kalit siyang gisagpa niini.
"Stop it Rodrigo!" Naghilak nga mipugong ang iyang inahan.
"Kung wala pa ko manawag sa inyong eskuylahan, dili nako mahibaw-an nga usa na diay ka bulan nga wala ka nay sulod-sulod sa imong mga klase. Imong gipakauwawan ang akong ngalan!" Mayor sa ilang lungsod ang iyang amahan.
"Dad, I'm sorry." Mihilak siya. Giduol siya sa iyang manghod. Gigakos siya niini.
"Dili nako gusto nga makakita pa sa imong dagway Janet. Suwail ka nga pagkaanak!" Mitalikod kini ug migawas sa lawak.
"Mom, I don't want to be a lawyer. I don't want to be like him." Midanguyngoy siya.
"Mao kana ang gusto sa imong amahan Janet ug unta imo siyang gisunod. Alang usab kini sa imong kaugmaon."
Nagdali nga gipangsulod niya ang iyang mga sinina sa maleta. Milakaw na ang iyang mga ginikanan. Bug-at na ang iyang nakab-ot nga hukom. Molayas siya.
"Ate, what are you doing? Molakaw ka?" Wala niya kini tubaga. Gipadayon niya ang iyang gibuhat.
"Ate, imo diay kong biyaan?" Gigunitan niini ang iyang mga kamot. Mihilak siya. Gigakos niya kinig hugot.
"I need to do this baby. Someday you will understand." Gibitbit na niya ang iyang maleta ug migawas sa iyang lawak.
Giablihan niya ang gate. Misunod gihapon ang iyang manghod.
"Cath, please get inside. Pangitaon ka karon ni Yaya Seding." Milabang siya sa karsada.
"Ate please don't leave me!" Kalit kining misunod kaniya ug wala na niini mabantayi ang elf nga nagpadulong.
"Cathleen!" Misinggit siya apan ulahi na ang tanan. Mao nalay iyang nakita nga naglunang na kini sa kaugalingong dugo. — Kataposan