Gradwado sa kurso nga mass communication gikan sa University of San Jose Recoletos ang paghisulod ni Chona sa media nagtangag og pangutana sa sinugdanan sanglit ang kanunay niyang gisulti kaniadto mao nga manimpad siya sa gawas sa nasud alang sa mas mahayag nga ugma. Mas daghan ang nakugang ug sa samang higayon mipakpak sa dihang nahimo na siyang police reporter alang sa Balitang Bisdak gumikan kay sa tunghaan kaniadto medyo dunay pagka-arte ug pagka maldita si Chona alang sa wala makasinati niya. Hinuon daan na nga nabantayan ang iyang ka agresibo ug kaisog diha sa mga aktibidad sa iyang napili nga kurso, tataw usab nga duna na siya'y gitago nga kahibaw diha sa matag kukabildo sulod sa lawak saringan.
Sa mga nagpakaila, bayot og batasan ang ilang paghulagway ni Chona sanglit alegre ug maabiabihon ang iyang personalidad. Malipayon, masinabtanon ug makamaong makigbugno sa mga pagsuway sa kahigayon, andam makigbisog ug manlimbasog sa iyang gibarugan nga prinsipyo ug kamatuoran. Dali siyang ikasinabot ug usa ka tinuod nga higala nga sa kanunay muonong sa kasakit man o sa kalipay. Siya ang matang sa higala nga bisan og dugay na nga wala igkita, igdungog ug makauban, ang iyang kadasig ug katam-is pabilin nga nagdilaab alang sa mainiton nga paghinigalaay.
Hangtud karon pabilin pa nga komedya tali sa iyang mga suod nga higala kadtong higayon nga bisan og duna na silay katabang sa panimalay, mibangon siya sayo nga kaadlawon niana aron maoy mangunay og luto sa pamahaw sa iyang mga classmates nga sa iyang pinuy-anan niadtong panahona mipasilong. Kun aninawon kadtong mga adlaw sa iyang pagka istudyante tataw nga dako na ang kausaban sa iyang panlantaw sa kinabuhi, sanglit pagkakaron nakita na niya ang iyang direksyon, ug kana mao ang paghatud og tiunay nga serbisyo publiko.
Nagsugod isip production assistant sa Balitang Bisdak pito na ka tuig ang milabay, ang iyang sakripisyo ug pagpasensya nagbunga dihang nahimo siyang mibidlisiw siya isip police reporter sugod niadtong mas gipakusgan ug mas gipalig-on ang nahisgutang local newscast niadtong October 2005. Diha sa iyang kaabtik ug kaisog, yano ra niyang gikilaw daw buwad ang mga hagit ug pagsuway nga sagubangon sa usa ka police reporter kansang pagpanghagpat og balita gikaluhaan nang daan sa peligro, giubanan na sa kanunay sa kakuyaw ug hulga. Dunay mga naglagot niya apan silang tanan human sa tumang pagpasabot nakaamgo nga tanan niyang gibuhat, "trabaho lang at walang personalan." Ning bag-o lang si Chona gidestino na isip Cebu City Hall reporter.
Ilailaha si Chona pinaagi niining, Banat Hugyaw On Cam.
Banat Hugyaw: Pangandoy ba gayud nimo ang masulod sa media?
Chona: Yup! When I was still a child mag-atubang naman jud ko sa mirror mag-report-report murag ngaub (buang). Nakigtigi pa gani ko sa akong mama kay Com.Sci may ipakuha kay dali ra maka-abroad unya ako man jud masunod, Masscom ako gusto.
Banat Hugyaw: Maayo ba nga babaye ang defense reporter? Dili malikayan nga dunay mga opisyal sa kapolisan nga mag-bigabiga bugti sa ihatag nga balita, giunsa nimo ni sila pag-atubang?
Chona: Sa mga polis deadma ra ko oy, naa man gyuy uban mga maniac.
Banat Hugyaw: Unsay labing halandumon nimo nga coverage? Ngano man?
Chona: Katong nag-cover mi og alarma sa squatters area while nag-interview ko sulod sa balay sa victim, daghang tawo nagtapok and then kalit naay singgit nga nibalik daw ang suspek nagbitbit og .45 cal pistol so nagkabuang na hapit nag-stampede sa kagamay sa dalan..naka heels pa jud ko natuslob ko sa kanal ug nakasulod og balay nga wako kaila sa tag-iya. As in nagkurog kurog jud ko.
Banat Hugyaw:Unsay dream coverage nimo?
Chona: Oh my God! Gubat sa Iraq siguro. Di ba challenging ang coverage pinusilay, binombahay, kulba sad.
Banat Hugyaw: Unsay prinsipyo nimo isip tigbalita?
Chona: Mo-report og unsa gyuy nahitabo, kumbaga walang kinikilingan, walang pinoprotektahan serbisyong totoo lang, Balitang Bisdak...hahaha.
Banat Hugyaw:Lima ka tuig gikan karon, asa na kaha ka ug unsa na kaha ka?
Chona: Naa gihapon siguro ko sa GMA-7 padayong nagserbisyo. Minyo nasad siguro ko...hehe.