'Rockerz nga Bisdak Nite' gilusad sa La Mer

Makapatandog gyud ang gipakitang kaikag sa mga bag-ong sulbong nga mga banda niadtong Rockerzdak Nite (Rockerz nga Bisdak) sa La Mer Café sa Mango Square. Ang hinugpong nga pwersa sa Republika, Flirt, KDB, Anorexia, Wet Slipperz ug Jimicycle pwerte gyung sipa-ang nagpasundayag bisan pa man sa kalimitado sa ilang kasinatian sa pagpanukar gumikan kay pipila ra man ang venues alang sa paglusad og mga kalihukan may kalambigitan ang local indie bands.

Usab, mao to'y matawag og testing kon naa ba gyu'y hatak ning mga bandaha kay lisud man sad moingon ta'g sudlon ang venue tungod lang kay nasagol sila's mga naa nay pangalan nga mga banda sa Sugbu.

Maayo ning proyektoha kay na-highlight gyud ang mga bag-ong kaplag nga mga banda gawas sa Jimicycle nga maoy usa sa mga proponents/pioneers/promotor sa Bisaya rock genre. Ugaling lang medyo lie low sila sa makadiyot tungod sa work priorities ug usab sa pagpangita og bag-ong bahista. Pero lagi naglatay man sa kaugatan ang pagpanukar, klaro kaayong gimingaw si Jimmelou Daclison sa crowd ug sa pagbunal sa iyang gitara sama niadtong sa Minglanilla nga concert sayong bahin ning tuiga. Mag-atang gyud ko'g makagay nang gitaraha kay mamunit ko'g tipaka pang-souvenir, akong buhatong burloloy para ikwentas ug i-ariyos namong duha ni Judith Sue...ahahahaha.

Salamat kay gisuportahan gyud ninyo ang Rockerzdak Nite, the first installment of a pocket concert/series sulod sa upat ka Sabado diha sa La Mer. Karong Sabado puhon, atangi ang lain pang hugpong sa mga bag-ong banda sama sa Yield, Fungus, Birth Control, Blood of the Stone, etc. Sa sunod pang mga semana, atangi usab ang 3ChordsChoir ug Jarc. Ingon man nadasig kaayo si Cyril Matutinao, ang marketing manager sa La Mer, sa performances sa Wet Slipperz, Republika ug Jimicycle nga plano niyang pabalikon og tukar. Attention sa mga concerned, please coordinate na lang mo ni Sir Cy kay sa petsa 28 mag-atiman ko sa among mangrove propagule planting sa Dalaguete with the Gaisanos of Taft Property.

Nalipay usab si Sir Cy sa pagtikang sa Indephums niadtong gabhiona gikan sa ilang laing gig kauban ang ilang "manager" nga si Madamme Chaka. Wow, hataw kaayo ni's Chaka pangdubdub sa iyang mga talents. Ana gyud, kinsa ra gu'y magtinabangay? Atol sa Open Mic, sa pag-open sa floor, nibunal gilayon ang Indephums nga aduna'y pagahimoong album launching karong November 11 sa Handuraw Events Café. Manawagan na lang kong daan ni Miss Zarah Smith nga gahinan ko'g reserved seat kay siguradong magdasok-punsisok gyud ang mga fans ani sa Indephums nga second diehard fan na lang daw ko kay si Jentot nga akong texter mao nama'y number one fan tungod ni Nantoy. Hala knowing kaha ni sa GF ni Nantoy? Wala nala'y kwenta ani si Mama Fe Cuizon nako? Number 12 fan na lang sha! Ahahahaha! Rated-R ang ulohan sa ilang album, taken from the first letters of their names - Ronan (bahista), Ryan (tambolista), Renan (gitarista) ug Ray (vox).

Medjo gisapot lang si Cyril niadtong gabhiona atol sa paglusad sa Rockerzdak Nite kay duna'y nakig-negotiate niya nga nagdala sa ngalan isip Enchi alang sa usa ka reggae party on November 10. Diay to usa lang diay sa mga banda wannabees nga gusto manggamit para mapansin. Nadugay nga psy-war ni Sir Cy, niangkon nga dili gyud sila ang Enchi hinungdan sa pag-ulbo ni Sir Cyril kay nasugdan na baya nako'g announce ang maong gig. May na lang nag-sorry pud ang nangilad. Sorry pud sa tanang na-excited sa pag-perform sa Enchi diri. Mangaminghoy gyud mo kay bluff ra diay to. Pagkawalay puangod sad aning ubang banda oi! Grrrrr....bisan unsa nala'y gimik para matagad. Piece of advice: Bai, seroki sa inyong banda ang talent sa Indephums para klaro gyud mo'ng mapansin. Mga ambisyoso mong mga iro-a mo!

Good news: Congratulations to D'Kazins ang kinamanghoran sa tanang Bisrock bands kay nalangkat nila ang grand prize sa gihimong band challenge diha sa Elizabeth Mall ning bag-o pa lang. Atangi ang uban pang mga detalye inigkaluto sa mga information nga akong pagahikayon pinaagi ni Mama Milet nga inahan ni Mary Adrean de la Cruz, ang drummer sa D'Kazins ug ni Sir Jimvoy Dionson nga ilang mentor, keyboardist sa Makadawa ug nagpaluyo sa pagkamugna sa "Naunsa Na?", ang single sa D'Kazins nga nanganaw-kanaw na karon sa Smash FM.

* * *

Bugsay...Bugsay MessageBoard

Text 09215323616 or email [email protected]

"First of all, I should say I think your column is something unique kaayo kay mka pahimutang najud mi sa among tagsa2x ka opinion specially tigsunod man sad ko sa smash ug sa dyRT pa sa una nga support jud sa atong local talents and in fairness to smash dako baya sad mo og ntabang sa atong mga local talents pro should i say dili kaayo tanto kay usa sa akong nbantayan sa smash is like balik-balik ang mga kanta puol kaayo unya kato rjud ang mga banda nga suod sa djs murag kintahay pabor2x ba. I think give chance pod mo sa uban nga mga banda nga i think dili kaayo sikat pero nindot jud ang ilang mga kanta nga dili nimo prmi madunggan sa radio. Naa koy nakuha nga mga samplers (CD), i think wala pa sa market of course dli pman ilado pero nag inquire ko to other radio stations kung pwde bako mka endorse/submit og bisrock cds and they said yes welcome daw kaayo nila ang bisrock. Dili pod unta masuko ang mga banda nga akong gustong iduso ilang songs sa laing stations kay mkatabang man pod nila firstly, dili pa sila ana madunggan ang ilang mga songs sa laing station dili lang sa smash nga pabor2x raman na diha. Thanks. - Willy, A CONCERNED CITIZEN