Mga tinuod nga ngalan

Yes, mga manash, manghilabot una ta ron og mga tinud-anay nga ngalan sama sa kauban namo dinhi sa The Freeman ug mga kauban natong mga artista dinhi sa Cebu. Kon si Maam Flor S. Ynclino o FSY, Flordeliza Suico Ynclino , si Jerry S. Tundag o JST Jeremiah Suico Tundag pod ang tinuod niyang ngalan so, paryente pod sila. Si Chino Gabutina dunay tinuod nga ngalan, pero wa ko'y authority pagbutyag niini, so ari na lang ta's mga artista sa Cebu aron dili ikiha. Si June Philipe Tar, sama sa ako nang nahisgotan dinhi kadaghan na, mao si Felipe Tariman, Jr., anak ni Pepe Tariman kon Peps Tar nga ang tinuod nga ngalan mao si Felipe Tariman, Sr., amahan sad ni Chris Yan kinsa, ang tinuod nga ngalan mao si Christian Tariman.

Pero nasayod ba gayod mo'g unsay tinuod nga ngalan niining ilado na kaayong artista nga gihinganlan lang og Pakol bisan asa? Siya si Diosdado Maga, Jr. ug igsoon siya sa iyang partner sa Dos Agodos nga si Ramil Maga. Apan si Ramil Maga sad, dili tinuod nga Ramil kay ang tinuod gayod niyang binunyagan mao man ang Estelito Maga. Silang duha, anaa usab sa "Tres Metros"

Kining giila na usab nga Boyoyoy nga bida sa teleserye kaniadtong binisaya nga "Boyoyoy da Wanderboy" mao si Jesus Sarda, Jr., anak sa negosyante nga si anhing Jesus Sarda, Sr. Ang partner niya karon nga usahay tawgon lang og King Borromeo o Enrico Borromeo or Eking, Enrique Borromeo ang tinuod nga ngalan ug usa ka negosyante og mga ice cream [flavor of the road], mga atop sa multicab ug mga bumpers ug ang iyang lugar [factory] anaa sa sitio Calero sa Catarman, Liloan, Cebu.